Sprjejcy. „Wróćo zhladować na puć do přichoda“ rěka hesło wosadneho wječora jutře, 21. awgusta, w Sprjejcach. Tam předstaji farar Jörg Michel we wobłuku Dnja Hornjeje Łužicy třeći a štwórty zwjazk Sprjejčanskeje cyrkwinskeje chroniki. Hinak hač připowědźene pak njewotměje so zarjadowanje we wosadnej rumnosći, ale w cyrkwi, hdźež móžeja wěstotny wotstawk lěpje dodźeržeć. Započatk budźe w 19 hodź.
Rejuja před hrodom
Ramnow. Rejwanske popołdnjo wotměje so njedźelu, 23. awgusta, w 15 hodź. w parku Ramnowskeho hrodu. Tam předstajeja klasiske reje k hudźbje Beethovena. Zajimcy płaća jenož normalny zastup.
Radwor (SN/MkWj). Planowany twar dweju halow Radworskeho ratarskeho předewzaća je na wčerawšim posedźenju tamnišeje gmejnskeje rady tójšto diskusije zbudźił. Gmejnscy radźićeljo mějachu wo tym rozsudźić, hač su z twarom přezjedni. Wo twarskej dowolnosći rozsudźi na kóncu twarski wotrjad krajnoradneho zarjada.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Lejnjanski dumperowy klub (14).
16. měrca 2003 załožichu w Lejnjanskim hosćencu towarstwo „Dumperowy klub Lejno“, kotremuž tehdy sydomadwacećo přistupichu. Spočatki pak leža dale wróćo. Jako trjebaše Zejičan Frank Domš 1995 při twarje swójskeho domu transportne wozydło, sej wot znateho dumper wupožči. Štož bě w NDRskim času trabant na dróhach, bě dumper na twarnišćach. Wot lěta 1958 do 1972 su we Wölkauwje pola Lipska tutón małotransporter, wuhotowany z ROBUR-motorom z wukonom 8,5 PS twarili. Zajimawe na jězdźidle je, zo ma prědku dwě kolesy a zady jedne, z kotrymž je šoferojo wodźa. Tak je dumper jara wobrotny, na tamnej stronje pak hrozy strach, zo so lochce zwróći.
Pücklerowy park dale spěchuja
Mužakow. Wopytawši Mužakowski park wjercha Pücklera chcyše kulturna statna ministerka Monika Grütters (CDU) dźensa dojednanje wo dalšim spěchowanju swětoweho namrěwstwa UNESCO ze sakskim ministerskim prezidentom Michaelom Kretschmerom (CDU) podpisać. Dotalne zrěčenje kónc lěta wuběži. Dale chcyštaj so dojednać wo nowotwarje Informaciskeho a kubłanskeho centruma Mužakowskeho zahorka.
Znješkódnja bombu w Grodku
Grodk. 50kilogramowu bombu z Druheje swětoweje wójny je słužba za wotstronjenje wojerskich srědkow dźensa wot 10 hodź. w Grodkowskim měšćanskim dźělu Dubrawa započała znješkódnić. Wuslědk njebě hač do redakciskeho kónca za tute wudaće znaty. Kaž měšćanske zarjadnistwo informuje, měješe 1 400 ludźi swoje bydlenje wopušćić, mjez nimi 98 wobydlerjow jedneje hladarnje.
Wjace hač 600 přeńdźenjow
Pytanje za zhubjenym přetorhnyli
Stróža. Dokelž bě pytanje za zhubjenym 44lětnym w Olbje pola Stróže tež wčera bjez wuspěcha, za nim najprjedy raz dale nurić njebudu, zdźěli policija. Specielnje wukubłane psy su póndźelu na bliskimaj městnomaj reagowali. Na njej su so wčera při nurjenju koncentrowali, bohužel bjez wuspěcha. Olba je tam něhdźe 20 metrow hłuboka, tak zo je nurjenje jara wobćežne. Nimo toho nurjacy pod wodu lědma pjeć metrow daloko widźa. Nětko policija a wuchowanske mocy wo nowej strategiji rozmysluja. Přiwšěm tež přichodne dny čołmiki policije po Olbje dale pojědu.
Lěšće (JoS/SN). Wot minjeneje njedźele su w Lěšćach (Hornow) widźeć wuslědki lońšeho fotoweho wubědźowanja Grodkowskeje regionalneje skupiny NABU. Pod hesłom „Mnohotnosć družin před našimi durjemi“ je 30 fotografow dohromady 69 wobrazow zapodało. Zo běchu k wotewrjenju w dožiwjenskej bróžni šokoladoweje fabriki Felicitas tež swójby z dźěćimi přišli, měješe předsydka regionalneje skupiny Sabine Brückner za dobre znamjo do přichoda. Lěta 2006 załoženej skupinje přisłuša 80 čłonow.
Mnozy z wobdźělenych fotografow zapopadnychu na swojich wobrazach insekty najwšelakorišeho razu. Tohodla rěčeše zapósłanc zwjazkoweho sejma Klaus-Peter Schulze (CDU) w swojich postrownych słowach wo jara aktualnej wustajeńcy, wšako je dźěl insektow wohroženy. Kak w Lěšćach wotemrěću insektow zadźěwać spytaja, móžachu sej wopytowarjo po wotewrjenju fotowustajeńcy na přechodźowanju po wsy k domicilej njetopyrjow, k baćonjacemu hnězdu a k łastojčej wěži wobhladać.
Budyšin (SN/MWj). Něšto tydźenjow diskutuja w Budyšinje intensiwnje wo twarje noweho mosta za pěškow nad Sprjewju. Po tym zo běchu plany wo wisatym mosće z blida, je nětko rěč wo tykowanym mosće. Do měšćanskeho zarjad- nistwa je dotal nimale 200 přispomnjenjow k projektej dóšło. Za měsac, 13. septembra, dóstanu zajimcy wo tym nadrobne informacije takrjec z prěnjeje ruki. Wot 10 do 17 hodź. chcedźa tu njedźelu, hdyž je hewak kóžde lěto dźeń wotewrjeneho pomnika, na dworje Hrodu aktualny staw projekta předstajić. Nimo wyšeho měšćanosty Alexandera Ahrensa (SPD) a dalšich partnerow ze zarjadnistwa budu tež zastupjerjo architekturneho běrowa Ehrlich na městnje, hdźež su studiju wo móžnosći tajkeho mosta zestajeli. Dale tež planowarjo Budyskeje twarskeje firmy Hentschke a zastupjerjo Němsko-Serbskeho ludoweho dźiwadła wo projekće informuja.