Krótkopowěsće (14.07.15)

wutora, 14. julija 2015 spisane wot:

Merkel w Drježdźanach była

Drježdźany. Zwjazkowa kanclerka An­ge­la Merkel je so dźensa w Drježdźanach wo najnowšich wuwićach na polu mikroelektroniki wobhoniła. Zhromadnje z mi­­nisterskim prezidentom Stanisławom Ti­li­chom a ministerku za slědźenje Johannu Wanku (wšitcy CDU) wopyta wona předewzaći Globalfoundries a Infineon kaž tež Frauenhoferski institut.

Trjebaja mjenje brunicy

Essen. Energijowy koncern RWE trjeba hač do kónca lěta hač do 15 procentow mjenje wuhla k zmilinjenju hač minjene lěta. Dotal pak hišće njewědźa, kotre blo­ki­ milinarnjow zawru, koncern dźensa zdźěli. Ludźi pušćić chcedźa na „fairnje a znjesliwe wašnje“, kaž rěkaše. Zwjazkowe knježerstwo bě rozsudźiło, starše bloki zawrěć a koncerny za to wotškódnić.

Špatna nalada w firmach

Halle. Nalada we wuchodoněmskich industrijnych předewzaćach je dale po­chmurjena. To poćahuje so na posu­dźowanje aktualneho połoženja kaž tež na wočakowanja do přichoda, Institut za hospodarske slědźenje w Halle zdźěla. Woprašeli běchu so 300 předewzaćow.

U19 hižo zwrěšćiła

Policija (14.07.15)

wutora, 14. julija 2015 spisane wot:

Wulki Wjelkow. Kiosk prazwěrjenca we Wulkim Wjelkowje bě minjeny kónc tydźenja cil paduchow. W twarjenju woni wšitke rumnosće přepytachu a pokradnychu třicyfrowu sumu pjenjez. Nimo toho chcychu so do dalšeje hěty zadobyć, štož pak so njeporadźi. Wěcna škoda wučinja dohromady 600 eurow.

Flamenko najwjace ludźi přiwabił

póndźela, 13. julija 2015 spisane wot:
Pólska cyganka, kotraž španiski flamenko rejuje, a to we wobłuku z Pólskeje pochadźaceje skupiny, kotraž bě so pod nawodom Metoda-Ławrjenca Rjenča hakle tři dny do festiwala prěni raz zetkała – to njebě jeno překwapjenka wječora na Kolic statoku, ale zdobom najwjetša atrakcija. Dwór bě přeco přepjelnjeny, jako wuprudźachu gitaristaj, rejwarce a rejwar kaž tež španiski spěwar dramatiski patos a palacy temperament andaluziskeje hudźbneje kultury. Woni wotměnjachu so z młodej skupinu Lidová muzika z Chrástu, jeničkim čěskim ansamblom, kotryž ma tež serbske pěsnje w repertoiru. Tak zaklinčachu tež spěwy kaž slepjanska „Kleskata reja“ abo „Dobry wječor, maćerka“. Třeći raz, tak moderatoraj Matej Wjeńka a Patricija Kralec publikumej přeradźištaj, běchu čěscy hercy hižo na festiwalu. Estiski ansambl Madara‘ předstaji polyfoniske Seto-spěwanje Leelo. Na pózdnim wječoru wustupištej pod nawodom Jurja Čornaka Drježdźanska skupina Podka, kotraž hižo dźesać lět serbske spěwy w němskej rěči w sakskej stolicy rozšěrja, kaž tež młody Lipšćanski projekt Serbska reja. CoR

Krótkopowěsće (13.07.15)

póndźela, 13. julija 2015 spisane wot:

Philipp Mißfelder njeboh

Berlin. Zapósłanc CDU w zwjazkowym sejmje Philipp Mißfelder je njeboh. 35lětny wonkopolitiski rěčnik frakcije unije zemrě minjenu nóc na emboliju płucow, kaž prezidij CDU zdźěli. Wón zawo­staji mandźelsku a dwě dźěsći. Mißfelder bě wot lěta 2005 zapósłanc zwjazkoweho sejma, wot 2002 hač do 2014 předsyda Młodeje unije Němskeje.

Nowe jězdźidła za pomoc

Budyšin. Sakski minister za nutřkowne naležnosće Markus Ulbig (CDU) je minjeny pjatk nowe awta za transport chorych přepodał. Wuchowanskej słužbje wo­krje­sow Budyšin a Zhorjelc dó­stanjetej kóžda tři nowe jězdźidła. Stare njebudu hižo wužiwane. W nowych awtach hodźa so pacienća tež zastarać.

Ponowja čěski dźěl přistawa

Praha/Hamburg. Čěska republika chce swój dźěl Hamburgskeho přistawa, tak mjenowany „Moldauhafen“, ponowić a jón lěpje zwičnić. Po rekonstrukciji piera kaž tež twarjenjow móhli tam hač do 15 łódźow kótwicować. Wot lěta 1929 wotnaja bywša Čěskosłowakska tři hektary Hamburgskeho přistawa, mjeztym pak je přestrjeń chětro zapušćena.

HSV dobył – FC Bayern posledni

Po nimale dźewjećlětnej přestawce maja w Choćebuskim zwěrjencu zaso dorost chinskich leopardow. Hladarka Manuela Haberland pokazuje tule małeho kocora Siana, kotryž je 8. julija, škitany před wopytowarjemi we wosebitej boksy za kulisami, na swět přišoł. Mać Faya přisłuša poslednim młodźatam leopardow w tudyšim zwěrjencu z lěta 2006. Nan Ninja pochadźa ze zwěrjenca w pólskej Łódźi a je na poručenje plahowanskeho koordinatora mjeztym hižo dwě lěće w Choćebuzu. Foto: Michael Helbig

Po wjacorych lětach kontrowersneje diskusije we wsy kaž tež we wopłóčkowym zaměrowym zwjazku Při Klóšterskej wodźe a po rozsudźe, Wotrow tola centralnej wopłóčkowej syći přizamknyć, tam nětko na wjacorych městnach twarja. Ćišćowe roły z wosebitej techniku pod pućemi do zemje „třěleja“, tak zo njetrjebaja dołhe hrjebje wuzběhać. Foto: SN/Maćij Bulank

Najebać problemy dale inwestuja

pjatk, 10. julija 2015 spisane wot:

Hakle wčera je Hamorska gmejnska ra­da­ hospodarski plan 2015 wobzam­kny­ła. Klětu měli so prjedy z tym za­běrać­, kaž gmejnscy radźićeljo na wčerawšim posedźenju porokowachu.

Hamor (AK/SN). Přestajenje wot kame­ralistiskeho na dwójne knihiwjednistwo (doppik) wobradźa tež Hamorskej gmejnje wulke starosće. „Najebać skrótšenja njeje naš hospodarski plan wurunany. Lětsa steji pod smužku deficit 2,16 mi­lionow eurow. Z toho su 1,894 milio­now eurow wotpisanja, kotrež dyrbimy po zakonju do plana sobu zapřijeć“, podšmórny komornica Carola Navrodt wčera na posedźenju gmejnskich radźićelow. Z jednym ­napřećiwnym a dwěmaj wzdatymaj hłosomaj woni hospodarski plan 2015 skónčnje schwalichu.

We wobłuku akcije „50 Hertz“ je Nowoporšiske zahrodnistwo Mörbe tele dny mjez Nowym Městačkom a Kanecami štomy sadźało. Wone tworja wurunanje za na­stajene milinowe sćežory mjez Budyšinom a Kamjencom. Při horcoće trjebaja młode­ štomiki wězo wodu. Tuž rěkaše najprjedy krjepić – a to nic mało, ale dźesać bowow za štom. Udo Stewig (nalěwo) a Marian Garbowski so wjeselitaj, zo dešćik mjeztym­ tróšku sobu pomha. Foto: SN/Maćij Bulank

Krótkopowěsće (10.07.15)

pjatk, 10. julija 2015 spisane wot:

Amokowy třělc dweju morił

Leutershausen. Amokowy třělc je dźensa dopołdnja w srjedźnej Frankskej dwě wosobje morił. Po informaciji policije zatřěli wón w Tiefentalu we wokrjesu Ansbach ze swojeho awta žonu. Krótko po tym mori muž w susodnej wsy ko­lesowarja, na čož ćekny. Policija móžeše jeho krótko na to zajeć. Motiw njeskutka njeje dotal znaty.

Wuswědčenja dóstali

Budyšin. Z přepodaćom wuswědčenjow je so za 42 000 šulerjow w Hornjej Łužicy dźensa šulske lěto zakónčiło. Minjene dny zeznajomichu so mnohe rjadownje na pućowanskich dnjach ze zajimawostkami w bližej domiznje. Nětko maja hólcy a holcy wulke prózdniny. Přichodny tydźeń poskićeja tež serbske zakładne šule prózdninsku zaběru.

Mjeńše naroki na wojakow

Praha. Čěska armeja chce někotre strowotne žadanja nastupajo zastup do swojich rjadow trochu „złahodnić“. Z wojakom stać móhli so tak na přikład tež ludźo­ ze synowej porskawu abo z lóšim defektom tarčoweje žałzy. Zamołwići reaguja na tučasny staw, po kotrymž hač do 60 procentow zajimcow za armeju postajene strowotne měritka njespjelni.

Policija (10.07.15)

pjatk, 10. julija 2015 spisane wot:

Čorny Hodler. We wulkim stilu diesel kradnyć chcyštaj paduchaj w nocy na štwórtk w Čornym Hodlerju. Dźakowano kedźbliwemu sobudźěłaćerjej spedici­skeje firmy pak so to njeporadźi. Wón bě jeju krótko po połnocy na terenje pře­mysłoweje přestrjenje wuhladał, hdźež wonaj z transporterow pilnje ćěriwo wuklumpaštaj.­ Lepjenaj so z awtom zminyštaj­, wzdawši so 24 kanistrow, kotrež běštaj zdźěla hižo z dieselom napjelniłoj. Hnydom alarmowana policija ćeknje­neju w bliskosći dosahny. Jedna so wo 39lětneho muža a wo 45lětnu žonu.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND