Tež to njemóžne druhdy zmóžnja

pjatk, 19. junija 2015 spisane wot:

W lěće 1991 bě sej Franc Wićaz z Njebjelčic na Kukowskim klóšterskim dworje w něhdyšej wuporjedźerni trak­torow­ zamkarnju za ratarske mašiny zarjadował a tam hač do dźensnišeho jako samostatny předewzaćel dźěła.

Pančicy-Kukow (SN/mwe). Nimale 25 lět wuporjedźa dźensa 52lětny woblubowany serbski zamkar w Pančicach-Kukowje ratarske mašiny, wot traktora přez płuh a synowobroćak hač k trawusyčakej, mopedy a awta kaž tež dalše mašiny a nastroje, kotrež wobsedźerjo domow za hladanje swojich ležownosćow trjebaja. Prawidłownje přijědźe kóždu druhu póndźelu­ na klóšterski dwór tež fachowc DEKRY, zo by tam na jězdźidłach pře­pruwowanje TÜV přewjedł.

Twar pěstowarnje po planje

pjatk, 19. junija 2015 spisane wot:

Chróšćanska gmejnska rada so personalnym rozsudam wěnowała

Chrósćicy (SN/mwe). Na spočatku wčerawšeho wuradźowanja Chróšćanskeje gmejnskeje rady je wjesnjanosta Maćij Brycka (CDU) nowowuzwolenemu wjesnjanosće Markej Klimanej (CDU) z Prawoćic z kwěćelom gratulował. „Přeju ći wjele wuspěcha a čuwow a widźimy, kak dale póńdźe“, Brycka rjekny. Poprawom chcyše wón Klimana spřisahać. Dokelž pak trěbne podłožki wokrjesa hišće njepředležachu, budu to w juliju na přichodnym posedźenju gmejnskeje rady nachwatać. Spočatk awgusta po rozžohnowanju z Maćijom Brycku chce Prawočan swoje zastojnstwo nastupić.

Wobtwarjenski plan wobzamkli

pjatk, 19. junija 2015 spisane wot:

Worklecy (aha/SN). Worklečanscy gmejn­scy radźićeljo wobzamknychu na wčerawšim­ posedźenju wob­twarjen­ski plan „Worklecy-Kozarčanski puć“ jednohłósnje. W februaru bě diplomowa inženjerka za krajinowe planowanje, Christine Tenne naćisk předstajiła. Předpisane žadanja wotpowědnje postajenemu časej, kaž su to zjawne wupołoženje a naprašowanja zjawnych nošerjow, buchu dodźeržane. Wčera wotwažowachu zapodate stejišća k naćiskej plana. Woprawnjene žadanja a pokiwy budu wobkedźbowane. Tak žada sej přirodoškitny wotrjad krajnoradneho zarjada, zo njesmě so pjećmeterske pasmo k parkowej muri wobtwarić a njesmě so tež ze štomami zwosadźeć, zo njeby chłódk w muri by­dlacym insektam škodźał. Kaž Sakski krajny zarjad za wobswět, ratarstwo a ge­ologiju postaja, dyrbi so zaručić, zo dešćikowa woda do něšto hłubšeje pěskoweje woršty wotběži. Krajny zarjad za archeologiju ma tři tydźenje do předwidźaneho twarskeho započatka informowany być. Radźićeljo su tomu kaž tež trěbnej změnje wustawkow wčera přihłosowali.

Krótkopowěsće (19.06.15)

pjatk, 19. junija 2015 spisane wot:

Hladanje dźěći budźe dróše

Drježdźany. W sakskej stolicy zwyša popłatki za hladanje dźěći wo 3,3 procenty. To je Drježdźanska měšćanska rada wčera wobzamknyła. Pozadk su stupace kóšty wobhospodarjenja. Wot 1. septembra změja starši tuž za městno w žłobiku 6,40 eurow a w pěstowarni 4,70 eurow wjace na měsac płaćić. Potrjecheni su tež starši, kotřiž swoje dźěći do serbskeje skupiny na Geisingskej sćelu.

„Kluby“ město hosćencow?

Praha. Čěske knježerstwo je zakoń wobzamknyło, kotryž wot 1. januara 2016 kurjenje w hosćencach a barach zaka­zuje. Wjacori hosćencarjo nětko rozmysluja, swoje předewzaća formalnje na „priwatne kluby“ přetworić. Čěska repu­blika je jedyn z poslednich krajow Europy, w kotrymž je kurjenje w hosćencach dotal lědma wobmjezowane.

Třećina w zarjadnistwach

Budyšin. Nimale třećina Budyskich dźěławych je w zarjadnistwach přistajena. W kubłanju, strowotnistwje a na socialnym polu dźěła 8 600 žonow a muži. We wobłuku wikowanja, wobchada a gastronomije dźěła 4 800 ludźi, w produ­kowacym přemysle 3 100. To wuchadźa z rozprawy „Budyšin w ličbach 2015“.

Rjelka/Lipič dale bjez poražki

Policija (19.06.15)

pjatk, 19. junija 2015 spisane wot:

Połčnica. Jako chcyše wodźer transportera wčera připołdnju w Połčnicy z ležownosće na puć wujěć, přewidźa wón bližacy so moped. Mopedist zrazy do transportera a padny. Při tym so tak zrani, zo dyrbjachu jeho w chorowni lěkować.

Biskopicy. Na křižowanišću blisko Schilleroweho naměsta w Biskopicach je wčera ně­hdźe w 19 hodź. 71lětna wodźerka VWja stopowe znamjo pře­widźała a jědźeše prosće dale. Při zražce z napřećo přijě­ducym Peugeotom so w nim sobujěduca 62lětna zrani. Ju dowjezechu do chorownje. Šofer wosta nje­zranjeny.

35 skupin na 14 jewišćach

pjatk, 19. junija 2015 spisane wot:

Kamjenc (SN). Kamjenc je jedne z městow po cyłym swěće, kotrež kóžde lěto 21. junija nadróžny hudźbny festiwal Fête de la Musique swjeća. Zajimcy móža zajutřišim w Lessingowym měsće wot 14 do 24 hodź. 35 skupin na štyrnaće jewišćach dožiwić. Mjez nimi budźe tež kapała Łužičenjo, kotraž w 14 hodź. na zahrodźe Muzeja zapadneje Łužicy hudźi.

Serbska hudźba w srjedźišću

Lichań (SN). Hród w Lichanju a k tomu słušacy park ze zarjadowanskej bróžnju njejstej jenož mjez kwasnymi porami woblubowanej. Někotre lěta je to přewšo krasna kulisa za kulturne zarjadowanja. Lětsa steji serbska hudźba w srjedźišću. Prěni koncert budźe zajutřišim, njedźelu, w 17 hodź. z Přezpólnymi.

Dźeń wobchadneje wěstoty

Budyšin (SN). Po cyłej Němskej wotměje so jutře dźeń wobchadneje wěstoty. Budyska wokrjesna wobchadna straža wočakuje zajimcow wot 9 do 14 hodź. na Žitnych wikach. Prezentować chcedźa tam krajne a zwjazkowe projekty, kaž akciju młodych jězdźerjow, ale tež pro­gramy předšulskich dźěći a seniorow. Na wopytowarjow čaka tójšto akcijow k sobučinjenju, mjez druhim test reagowanja a widźenja.

Štóž wšědnje ze zapadneho směra do Budyšina jězdźi, je so spočatk tydźenja dźiwał, zo njemóže z prowizoriskeho kružneho wobchada naprawo na Drježdźansku dróhu wotbočić a wottam přez Móst swjateho ducha do města jěć. Přičina su twarske dźěła na Drježdźanskej, hdźež kładu nowy kanal za dešćikowu wodu, wodowód a roły za wopłóčki. Twarske dźěła maja hač do decembra trać. Znajmjeńša pak ma po informacijach měšćanskeho zarjadnistwa za dwaj tydźenjej zaso móžno być, po Mosće swjateho ducha z města won a na zapadnu tangentu jěć. Foto: SN/Maćij Bulank

Swjeća w klóštrje a na zahrodźe

štwórtk, 18. junija 2015 spisane wot:

Wopyt klóšterskeho a swójbneho swjedźenja Budyskeho wokrjesa přichodnu njedźelu w klóštrje Marijinej hwězdźe w Pančicach-Kukowje zadani so za wulkich kaž tež małych zajimcow.

Pančicy-Kukow (SN/MWj). „Jednorje žiwy być – jednorje čłowjek być“ rěka hesło 6. klóšterskeho a swójbneho swjedźenja 21. junija w Pančicach-Kukowje. Ze swjedźenskimi kemšemi w 10.30 hodź. jón zahaja. W 13.15 hodź. přizamknje so koncert Kamjeničanskeho ansambla Agenda St. Jacob. Po zwučenym wašnju čaka na wopytowarjow wot 14 hodź. program „Patentne talenty“ z hudźbu, rejemi, ar­ti­stiku­ a žortom, moderěrowany wot Hei­ka Hariga. Tak poskića reje z towarstwami z Kulowa, Kinsporka a Arnsdorfa, instrumentalne kruchi šulerjow wokrjesneje hudźbneje šule, afriske rytmy z Wulkeje Dubrawy a folk- a countryhudźbu z Wojerec. Mjez sobuskutkowacymi budźe tež Serbski muski chór Delany. Akterojo wustupja na jewišću na kló­šterskim dworje runje tak kaž na jewišću klóšterskeje zahrody. W 17.30 hodź. swjeća zakónčacu ekumenisku nutrnosć. Cyły­ dźeń budu regionalne a přirodowe wiki z 55 wikowarjemi a rjemjeslnikami.

Wjesnjanosta spřisahany

štwórtk, 18. junija 2015 spisane wot:

Rakečanscy radźićeljo lětuši hospodarski plan wobzamknyli

Rakecy (aha/SN). Na wčerawšej zhromadźiznje Rakečanskeje gmejnskeje rady je Günter Eichler (CDU) jako najstarši noweho wjesnjanostu Swena Holgera Nowotneho (CDU) spřisahał a zawjazał. Na jeho městno jako dotalny radźićel bu Tobias Schelzig zawjazany.

Z nowym wjesnjanostu Rakec mějachu wčera wobšěrny dnjowy porjad z 18 dypkami rozjimać a wobzamknyć. Bu­dyski krajnoradny zarjad bě wobzamknjenja na posedźenjomaj rady w aprylu a meji jako­ njepłaćiwe hódnoćił, dokelž njebu předpisana forma na přeproše­njomaj dodźeržana. Nawodnica Rakečanskeho financneho wotrjada Franciska Pfeiffer rozłoži aktualny staw konsolidowanskeho plana a móžeše na pozitiwny trend nastupajo wuwiće likwidnych srědkow skedźbnić. Wot lěta 2014 su so wone wot 340 000 na mjeztym 197 000 eurow znižili.

Krótkopowěsće (18.06.15)

štwórtk, 18. junija 2015 spisane wot:

Ličby nad přerězkom

Budyšin. Najnowše łopjeno „Budyšin w ličbach“ z měšćanskeho zarjadnistwa podawa aktualne ličby wo sprjewinym měsće. Mjez druhim informuje wo hospodarskich wukonach Budyskich přede­wzaćow. 1 463 firmow nadźěłuje lětnje wobrot połdra miliardy eurow. Přerězny lětny wobrot 800 000 eurow na zawod leži­ jasnje nad sakskim přerězkom.

Wjesčičku bórze zaso wožiwja

Liboń. Energetiske saněrowanje prěnjeho domu w Libonje je zakónčene. Mějićel Andreas Reitmann rjekny, zo budu prěnje bydlenja za dźewjeć měsacow hoto­we. Štyri z cyłkownje sydom bydlenjow su hižo přenajate. Zajimcy pochadźeja mjez druhim z Drježdźan. Planowanja za prózdninski dwór we wjesčičce hišće wotzamknjene njejsu.

Wo serbskich stawiznach

Choćebuz. Dr. Pětš Šurman a Alfred Roggan staj wčera knihu wo serbskich kulturnych stawiznach Choćebuza a wokoliny w tamnišim Serbskim muzeju předstajiłoj. Jako 9. zwjazk rjadu Choćebuskeho Serbskeho muzeja a Serbskeho instituta „Serbske drogotki“ ma kniha nazymu wuńć. W srjedźišću steja serbske kulturne pomniki.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND