Gmejna Slepo a koncern LEAG matej zakładne zrěčenje mjez komunu a předchadnikom Vattenfallom nastupajo wotškódnjenje po Wochožanskej brunicowej jamje a wo komunalnym wuwiću w dalokej měrje za spjelnjene.
Slepo (AK/SN). Dwanaće lět po tym zo bu tak mjenowane Slepjanske zrěčenje 2008 podpisane, je wone tak daloko spjelnjene. To je Slepjanska gmejnska rada njedawno wobkrućiła. „Financowanske zrěčenje z 28. septembra 2015 wo najwažnišim komunalnym twarskim projekće, nowotwarje Němsko-Serbskeho šulskeho kompleksa Slepo, je hórniski koncern spjelnił a dojednany płaćenski plan dodźeržał“, podšmórny Slepjanski wjesnjanosta Reinhard Bork (njestronjan) w předłoze k wobzamknjenju.
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny rjad drobnych a małych projektow předstajeja.
Malešanska Witaj-pěstowarnja „K wódnemu mužej“ je nastupajo nowe ideje, kak ze serbšćinu we wsy wobchadźeć, prawa kowarnja idejow. Nic naposledk je sej předsydka jeje staršiskeje přirady Nadine Noack kłobuk na hłowu stajiła a hromadźe z dalšimi staršimi rozmyslowała, kak móhli wjesnjanow za zhromadne akcije zdobyć a při tym wězo něšto za serbsku rěč činić. „Zhoniwši wo wospjetnym wubědźowanju sakskeho fondsa ,Čiń sobu!‘ sym naše mysle prosće napisała a zapodała“, powěda 36lětna hladarka starych. Wosomlětna dźowka Liza chodźi w Malešecach do horta SŠT, jeje třilětna sotra Sofija do pěstowarnje.
Nadawk za wustawoškit
Drježdźany. Sakski minister nutřkowneho Roland Wöller (CDU) ma protesty přećiwo korona-naprawam z wobdźělenjom prawicarskich ekstremistow za nadawk wustawoškita. Tajke wuwiće njesmě so prosće ćerpjeć. Minister poćahuje so při tym wosebje na protesty při zwjazkowej dróze B 96 w Hornjej Łužicy.
Z nowym předsydstwom
Kulow. Wyšej měšćanostaj Biskopic a Kamjenca prof. dr. Holm Große a Roland Dantz hromadźe z Ronaldom Homolu z Kulowa, Sandrom Fiebigom z Wojerec a Veitom Großmannom z Großröhrsdorfa chcetaj wobsahowe dźěło Swobodnych wolerjow Budyšin z.t. w přichodnych pjeć lětach dale wuwiwać. Čłonska zhromadźina bě jich njedawno do noweho předsydstwa wuzwoliła.
Worjoł zaso na hrodźe
Tři awta wobškodźene
Biskopicy. Wuparkować njeje kóždemu date. To zwěsćichu dźensa w 6.15 hodź. wobydlerjo na Biskopičanskej Ernsta Thälmannowej. Šofer Peugeota bě při wróćo jězdźenju z parkowanišća nimo jěducy BMW přewidźał. Tón zrazy wotzady do Peugeota, kotryž suny so do dalšeho parkowaceho Mitsubishija. Šofera BMWja su na městnje lěkarsce zastarali.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Stawizniske towarstwo RAK z.t. Rakecy (3).
W měrcu bě tomu jědnaće lět, zo su wjacori stawiznisce zajimowani a ze serbskej zašłosću Rakec zaběracy so załožili stawizniske towarstwo RAK z.t. Mjeno RAK pokazuje na serbske pomjenowanje wulkeho sydlišća a zbudźa runočasnje zajim za stawizny wsy. Wšako njekryje so serbske mjeno z němskim Königswartha. Wobdźěleni na załoženskej zhromadźiznje sej tehdy prajachu, zo podadźa so „na pućowanje do dawno zabytych časow. Nochcemy slědźić a so kóždy sam za sebje w swojej komorce ze stawiznami zaběrać, ale chcemy wšitke naše dopóznaća a wědu zjawnosći spřistupnić.“
Šulerka na koronu schorjeła
Budyšin. We wokrjesu Budyšin je nowy koronapad. Tudyši krajnoradny zarjad wčera informowaše, zo běše test pola šulerki Kamjenskeho Lessingoweho gymnazija pozitiwny. Kontaktne wosoby su spěšnje zwěsćili a do karanteny pósłali. Wuslědki jich testow hišće njepředleža. Šulski wotběh njeje wohroženy, kaž z krajnoradneho zarjada rěka.
Halowu kupjel dale planuja
Budyšin. Přetorhnjene planowanja za narunanski nowotwar Kamjenskeje haloweje kupjele móža dale wjesć. Budyski wokrjesny sejmik je na swojim wčerawšim posedźenju zarjadnistwu nadawk dał, dwě warianće přepytować dać. Prěnja je basenk z pjeć čarami, druha ze šesć čarami a ze sawnu. Inwesticija njesměła 15 milionow eurow překročić. Wo doskónčnej warianće sejmik klětu rozsudźi.
Nowy terminal za spěšnoćahi