Gmejna Hornja Hórka je pućrubarka nastupajo komunalny energijowy management. Tamniša sportownja bě jedyn objekt, hdźež móžachu energijowe kóšty nahladnje znižić. Na to wokrjes Budyšin rady skedźbnja, dźe-li wo to, dalše komuny za tajke postupowanje sensibilizować. W nowym zrěčenju wo dalewjedźenju wokrjesneje energijoweje agentury přez Budyski technologijowy a załožerski centrum je tematika komunalneho energijoweho managementa jako wusahowacy dypk zapřijata. Zo chce wokrjes nimo toho swójsku syć energijoweje eficiency wutworić a tak zajimowane tudyše komuny dlěje tajkim syćam Sakskeje energijoweje agentury njepřewostajić, posrědkuje zaměrej přidatnu praktisku stronku. K tomu wotpohladane rozmołwy wo­krjesneje energijoweje agentury z gmejnami maja bjezdwěla šansu na wuspěch. Wšako steja naprawy bjez wulkich inwesticijow w srjedźišću. Axel Arlt

Budyski technologijowy a załožerski centrum energijowu agenturu Budyskeho wokrjesa dale wjedźe. We wuslědku wospjetneho wupisanja bu wčera nowe zrěčenje na tři lěta podpisane.

Budyšin (SN/at). Energijowy přewrót trjeba wěcywustojnych fachowcow, kotřiž komuny, předewzaća a wobydlerjow wšitke z maćiznu zwisowace naležnosće nastupajo poradźuja. Budyski wokrjesny sejmik bě tohodla w oktobrje 2012 wobzamknył, swójsku energijowu agenturu wutworić. Najbóle přeswědčiwy koncept předpołoži tehdy Budyski technologijowy a załožerski centrum (TGZ).

Chowanje słónca z dobrej kapku pod hołym njebjom před pitoresknej kulisu Budyskeho stareho města dožiwić – takle wabi wot wčerawšeho wotewrjena bara „Sundowner“ na tak mjenowanej byrgarskej zahrodźe Serbskeho ludoweho ansambla. Hač do kónca awgusta móžeš sej tam wšědnje wot 17 hodź. serbsce a němsce skazane cocktaile, piwko, winko abo brěčku zesłodźeć dać. Na wuzwolenych terminach wobrubjeja wuměłcy barowy wječory z kulturnymi programami. Dźensa wječor we wosmich na přikład přeproša smyčkowy kwartet Chordophone na „Klinčace nócne fantazije“, na čož so tež pinčnica Luisa Marko ze Zejic wjeseli. Foto: SN/Hanka Šěnec

Korony dla zemrěła

Budyšin. W Budyskim wokrjesu žane nowe infekcije z koronawirusom njejsu. Ličba mortwych pak je na 20 rozrostła, rěka z krajnoradneho zarjada. 29. junija zemrěta 93lětna bě spočatk meje na koronu schorjeła a bu hač do kónca junija pozitiwnje na wirus testowana. Jako scho­rjena njebě wjace registrowana, sakski krajny wustaw pak je poručił ju do statistiki mortwych korony dla přiwzać.

Wo namrěwstwje rukowaćelnje

Kamjenica. Druha wuměłska bienala POCHEN wěnuje so składnostnje 30. róčnicy zjednoćenja Němskeje pod hesłom „Płaćizna přichoda“ towaršnostnemu namrěwstwu rukowaćelnje. Wot 22. oktobra do 1. nowembra předstaja w Kamjenicy 50 wuměłskich pozicijow, kotrež so awdiowizuelnje a scenisce z temu „změna – transformacija – přewrót“ rozestajeja. Kulturna załožba Zwjazka spěchuje projekt ze 70 000 eurami.

Spěchuje wažne projekty