Ličba infekcijow dale přiběra
Budyšin/Zhorjelc. Přez kónc tydźenja je ličba z koronawirusom natyknjenych w Budyskim wokrjesu na 416 (+33) rozrostła. Z toho je 106 schorjenych, jědnaćoch lěkuja w chorowni. Dohromady 297 ludźi je so wustrowiło. W Zhorjelskim wokrjesu je dale 268 inficěrowanych, nowe pady njejsu zwěsćili. 32 wosobow je tuchwilu chorych, dwě stej w klinice. 214 ludźi je zaso strowych.
Wjace hač 70 wobdźělnikow
Budyšin. Pod hesłom „Explainity ze swójskimi rysowankimi III“ je Berlinski designer Šćěpan Hanuš minjeny pjatk dalšu online-dźěłarničku w Sakskim wukubłanskim a wupruwowanskim kanalu Budyšin (SAEK) podał. Dohromady 73 serbskich wobdźělnikow je dotal zhoniło, kak móhli animaciske filmy zhotowić. 28. meje planuje SAEK webinar ze Šćěpanom Hanušom za němskorěčnych.
Kniha Wenzela znowa na předań
Róžant (SN/JaW). Po dlěšej přestawce su so wčera zapósłancy gmejnskeje rady Ralbicy-Róžant zaso w Róžeńće schadźowali. Hnydom na spočatku prócowachu so wjacori radźićeljo, přiwzać na dnjowy porjad naprašowanja radźićelow a wobydlerjow. Woboje njebě wjesnjanosta Hubertus Ryćer (CDU) koronapandemije a płaćiwych postajenjow dla wobkedźbował a nochcyše to tež změnić. „Wjacore komunalne gremije, kotrež su minjene dny wuradźowali abo budu wuradźować, maja tónle dypk na dnjowym porjedźe. Jenož pola nas to móžno njeje“, kritizowaše radźićel Swobodneho wolerskeho zjednoćenstwa Delany Tomaš Bjeńš. Radźićeljo pak přesadźichu, zo smědźa so znajmjeńša woni naprašować. Jako bě dnjowy dypk na rjedźe, wjesnjanosta přiwšěm wo prašenja njerodźeše, dyrbješe pak so ćišćej kłonić. Porjadnje prašeć so přiwšěm njemóžachu, dokelž wjesnjanosta naprašowanja zdźěla podusy.
Pjanej awto wodźiłoj
Pančicy-Kukow/Jěžow. Jězbu hnydom dweju šoferkow, kotrejž běštej wopitej z awtom po puću, je policija předwčerawšim popołdnju w Pančicach-Kukowje a w Jěžowje skónčiła. Na Dróze Ćišinskeho w Pančicach napadny zastojnikam při kontroli „chorhojčka“ 53lětneje šoferki Forda. Test wunjese 0,54 promilow. W Jěžowje zakazachu policisća 67lětnej dalejězbu. Test bě wujewił, zo měješe wona 1,34 promilow alkohola w kreji.
Łazowska gmejna nadźija so dobrych efektow za turizm, gastronomiju a drobnowikowanje
Łaz (AK/SN). Podłu aleje z Łaza do Běłeho Chołmca ma na zapadźe Třižonjanskeho jězora nastać regatowa čara. „Jedna so wo tak mjenowanu ‚paragraf-4-naprawu‘, zo by so zwyšił standard naslědneho wužiwanja we wobłuku saněrowanja a hórniskich kónčin“, rozłoži wjesnjanosta Thomas Leberecht (CDU) na minjenym posedźenju Łazowskeje gmejnskeje rady. „Nošerka projekta je Łužiska a srjedźoněmska towaršnosć hórnistwoweho zarjadnistwa (LMBV), naslědny wužiwar je Drježdźanske wodosportowe towarstwo ‚Při Módrym dźiwje‘. Proceduru přizjewjenja a přizwolenja běchu w lěće 2017 zahajili. Lětsa nětko je ze zwěsćenjom wodoprawniskeje dowolnosće natwar připrawy zarjadnisce zaručeny.“
Dale wjace infekcijow
Zhorjelc/Budyšin. W Budyskim wokrjesu je tuchwilu 383 (+ 9) z koronawirusom natyknjenych. Nowoinfekcije zwisuja přewažnje z chětro potrjechenej ambulantnej hladanskej słužbu w Kamjencu. W Zhorjelskim wokrjesu je dalša wosoba na wirus zemrěła. Dohromady je tam dotal 22 smjertnych padow. Dokelž njejsu wčera žane dalše natyknjenje zwěsćili, wosta ličba inficěrowanych 268.
Druhi raz nominowanaj
Drježdźany. Předewzaće „Helmheld“ Gordiana Krala z Chelna a Tima Döki z Budyšina je znowa za sakske předewzaćelske myto w kategoriji „Start-Up“ nominowane. W Drježdźanskim wobchodźe a w interneće předawataj wonaj kolesowarske nahłowniki. W škleńčanej manufakturje sakskeje stolicy chcedźa předewzaćelske myto 5. junija spožčić.
Poskitk Płomjenja w syći
Měšćanska biblioteka a zwěrjenc we Wojerecach stej zaso přistupnej, Měšćanski muzej na tamnišim hrodźe pak wostanje dale zawrjeny.
Wojerecy (SN/JaW). Po mjeztym sydomtydźenskej nanuzowanej přestawce stej Wojerowska měšćanska biblioteka Brigitty Reimann a tamniši zwěrjenc nětko zaso přistupnej. Wo tym informuje sobudźěłaćer Měšćanskeho zawoda zwěrjenc, kultura a kubłanje Felix Pál w nowinskej zdźělence. „Wjeselimy so ze swojim poskitkom k tróšku normaliće w tymle ćežkim času přinošować a tak předewšěm swójbam po tydźenjach wulkich wobmjezowanjow znowa wotměnu, wjeselo a wočerstwjeneje skićić směć“, pisa jednaćel měšćanskeho zawoda Arthur Kusber k znowawotewrjenju wobeju zarjadnišćow we Wojerecach.
Kontroluja škitne naprawy
Budyšin/Zhorjelc. Policija wokrjesaj Budyšin a Zhorjelc tele dny podpěruje, zwoprawdźenje wukazow škitnych naprawow koronawirusa dla pruwować. Kaž w zdźělence policije rěka, su zastojnicy tohodla w zjawnosći prezentniši, tež na dwurěčnych wsach Hornjeje Łužicy, a pruwuja zdobom pokiwy wobydlerjow. Wjetšina so po postajenjach ma. Wutoru pak dyrbjachu uniformowani wjacore razy zakročić a zetkanja rozpušćić.