Budyšin. Z kreatiwnymi taflowymi wobrazami zaběra so online-dźěłarnička w serbskej rěči, kotraž wotměje so jutře, wutoru, wot 13 hodź. Nawjedować budźe ju grafikar Šćěpan Hanuš z Berlina. Myslena je dźěłarnička předewšěm za serbskich wučerjow. Woni kaž tež dalši zajimcy nadeńdu link na stronje www.saek.de/bautzen. Tam su tohorunja pokazki na dalše zajimawe online-poskitki, mjez druhim na webinar 23. apryla wo telewizijnych wusyłanjach za čas přewróta.
Radźićeljo so zetkaja
Radwor. Při wšěch wobmjezowanjach koronoweje krizy dla wotměje so jutře, wutoru, w 19.30 hodź. posedźenje Radworskeje gmejnskeje rady, nic pak w gmejnskim zarjadnistwje, ale w sportowej hali „Slavia“. Na spočatku spřisahaja nowowuzwolenu Radworsku wjesnjanostku Madeleine Rentsch. Dalša tema budźe rozpušćenje dojednanja z Wulkodubrawskej gmejnu wo wobchadoprawniskich nadawkach. Za Wincenca Baberšku budźe to poslednje posedźenje gmejnskeje rady, kotrež wón jako wjesnjanosta nawjeduje.
Dźěwin (AK/SN). Käthe Piontek słuša k najswěrnišim kupcam. Póndźelu a wutoru kupi sej wona chlěb a całty, srjedu zeleninu. „Dźensa, pjatk, wozmu macoški za kěrchow sobu“, powěda 80lětna. Wjesny wobchod za žiwidła, zakuski a darowanski serwis w swojej wsy nochce parować. Hižo 22 lět wona tu nutř a won chodźi, runje tak dołho kaž wobchod dźakowano Doreen Thumann wobsteji. „Njebychmy-li jón měli, bychmy daloko jězdźić dyrbjeli“, měni Anneliese Jakob. Steffen Schur praša so za nuznikowej papjeru. We wulkimaj kupnicomaj žanu dóstał njeje. Egoizm někotrych sobučłowjekow jeho mjerza. W Dźěwinskim wjesnym wobchodźe pak papjeru maja.
Mnohich Worklečanow zajimuje, kak z bywšeje wjesneje kupnicy dnjowa hladarnja za starych ludźi nastawa. Někotři su tam samo hižo po twarnišću dundali, štož pak njeje dowolene. SN su so wo aktualnym stawje wobhonili.
Worklecy (SN/MWj). Na twarnišćach je přistup zakazany. To płaći tež za bywšu Worklečansku kupnicu. Dokelž pak někotrehožkuli wjesnjana zajimowaše, kajke tam nětko wupada, dyrbješe mějićel Carsten Šnajder twarski płót wokoło swojeho objekta stajić, zo njeby k njezbožam dóšło. Serbske Nowiny pak smědźachu so takrjec oficialnje rozhladować.
Wonkownje jako prěnje napadnje, zo su so wjacore štomy na ležownosći zhubili. „Te běchu na puću, dokelž ma so tam přizamknjenje pitneje wody kłasć. Nimo toho planuju na třěše fotowoltaisku připrawu, kotraž by hewak w chłódku štomow była“, zawěsćenski markler rozłoži. Před jeho běrowom nastawa tuchwilu betonowa plata, na kotrejž ma so zawěsćenski běrow rozšěrić.
Mjenje nowoinfekcijow korony
Budyšin/Zhorjelc. Ličba wobkrućenych koronainfekcijow w Budyskim wokrjesu je njedźelu na 326 rozrostła. Sobotu bě jich štyri mjenje. Ličba aktualnje přikazanych karantenow wučinja 416. Dźesać pozitiwnje testowanych wosobow tuchwilu w chorowni lěkuja. W Zhorjelskim wokrjesu je 243 wobkrućenych padow korony. Porno soboće njeje so tuž ničo změniło.
Jury chce srjedu rozsudźić
Budyšin. 36 dźěći a młodostnych je so na wubědźowanju wo najrjeńše jutrowne jejko dźěći a młodźiny wobdźěliło. Wo tym informuje projektna managerka Domowiny Rejzka Krügerowa po zakónčenju wurisanja minjeny pjatk. Wšitkich sydom starobnych skupin je zastupjene. Srjedu chce jury w Budyskim Serbskim domje wo najrjeńšim jejku rozsudźić.
Strach lěsnych wohenjow přiběra
Rakecy (JK/SN). Awla Pawołskeje šule spjelnješe předwčerawšim za posedźenje Rakečanskeje gmejnskeje rady wuměnjenja, kotrež maja so pod tuchwilnymi krizowymi poměrami dodźeržeć. Dosć wotstawka mjez sobu zaručichu we wulkim kole nastajene separatne blida a wjesnjanosta Swen Nowotny (CDU) rozdźěleše na spočatku posedźenja hišće k tomu škitne maski za hubu a nós, kotrež pak nichtó z přitomnych njewužiwaše.
Trěbne posedźenje bě, dokelž bě so po słowach wjesnjanosty dosć naležnosćow nahromadźiło, wo kotrychž by so měło w přitomnosći wšitkich radźićelow wuradźować. K zazběhej Nowotny radźićelow informowaše, kak je gmejnski zarjad w minjenym napjatym času dźěławosć a docpějomnosć za wobydlerjow zaručił. Dźěłaja tam z dwěmaj njewotwisnymaj mustwomaj, kotrejž běžne nadawki zarjadnistwa spjelnitej a kontakty k krajnoradnemu zarjadej w Budyšinje a k wobydlerjam a towarstwam wudźeržujetej, štož je dźakowano modernym komunikaciskim srědkam derje móžno.
Mały Wjelkow (SN). Kriza korony dla potrjechi njeličomne wobłuki. Tež wólnočasne zarjadnišća su hižo tydźenje zawrjene, tak zo jim dochody pobrachuja. Potrjecheny je tohorunja Małowjelkowski prazwěrjenc. „Chcemy pak w tymle ćežkim a njezwučenym času rady tych trochu podpěrać, kotřiž maja to sobu najbóle trěbne, mjenujcy coologiske zahrody a zwěrjency. Wone trjebaja nuznje pjenjezy za picu, skótneho lěkarja a za personalne wudawki“, praji Volker Bartko, jednaćel Budyskeje wobdźělenskeje a wobhospodarjenskeje towaršnosće (BBB), kotraž ma Małowjelkowski park na starosći.
Prazwěrjenc chce přichodne dny hornjołužiskim zwěrjencam w Zhorjelcu, Žitawje, Běłej Wodźe, Biskopicach a Wojerecach stajnje 5 000 eurow darić. „Naše prazwěrjata drje su runje tak samotne kaž druhe, wone pak ničo nježeru a tuž chcemy rady zwěrjata picować pomhać, kotrež maja to nuznje trjeba“, doda Volker Bartko z posměwkom. Wón so nadźija, zo móža Małowjelkowski park kaž tež zwěrjency a coologiske zahrody bórze zaso wočinić a wopytowarjow witać.
Přewjele alkohola pił
Chrósćicy. Chwilu swojeho awta wzdać drje dyrbi so přichodnje muž, kotrehož lepi policija předwčerawšim wječor w Chrósćicach. Tam zadźeržachu 49lětneho wodźerja Škody na Pomnikowym puću. Z alkoholowym testom zastojnicy zwěsćichu, zo měješe wón 1,26 promilow alkohola w kreji. Dalša konsekwenca bě, zo dyrbješe potrjecheny krej wotedać. Nimo toho přizjewichu policisća delikt wopiłstwa w nadróžnym wobchadźe a sćazachu jězbnu dowolnosć.