Policija (01.04.20)
Małe swjedźenje rozpušćili
Budyšin. W nocy na wutoru su policisća w Budyskim a Zhorjelskim wokrjesu dodźerženje płaćiwych postajenjow koronowirusa dla kontrolowali. Při tym wobdźěłachu 52 chłostanskich přizjewjenjow přeńdźenja přećiwo zakonjej wo infekciskim škiće dla a kazachu 20 ludźom, zo měli domoj hić. W Budyšinje na přikład słyšachu haru z bydlenja na Hasy Ricardy Huch. Nimo dweju wobydlerjow běštaj tam hosćej, a wšitcy štyrjo zhromadnje swjećachu. Podobny pad dožiwichu na Löfflerowej we Wojerecach. 28lětny wobydler bě sej sydom ludźi přeprosył. Woni a dalši w Zhorjelcu, Lubiju a Ottendorfje maja nětko z pokutu ličić.
Na česć Zejlerja a Kocora
Budyšin. Domowina prosy serbske institucije, towarstwa a zwjazki, Lěto Zejlerja a Kocora sobu wuhotować. Pytane su namjety, kak je swjećić. Prěnje ideje hižo předleža, kaž wuhotować po historiskim přikładźe prěnich spěwanskich swjedźenjow zhromadny koncert ze wšěmi chórami Łužicy w Budyskej „Krónje“. Tež na ekumenisku nutrnosć za serbske chóry w Pětrowej cyrkwi je myslene. W lěće 2022 spominamy na 150. posmjertniny Handrija Zejlerja a 200. narodniny Korle Awgusta Kocora.
Najrjeńšu paslenku zhotowić
Chrósćicy. Kamjenska župa „Michał Hórnik“ namołwja swójby, zo bychu zhromadnje paslili. Za wobdźělenje na wubědźowanju wo „Najrjeńšu jutrownu paslenku 2020“ njech sćelu foto swojich wudźěłkow hač do 5. apryla z mjenom, adresu a informaciju, štó je paslenku zhotowił, na mejlowu adresu . Na foće pak smě jeničce paslenka widźeć być.
Dołha nóc kulturow njebudźe
Pódlanski efekt: knotwišća zrunać
Módre žaby wobkedźbować
Móža wšelake dróhi zwuporjedźeć
Kulow (AK/SN). Město Kulow chce krok po kroku wjacore dróhi w komunje saněrować. „Dźakowano inwesticiskej pawšali Swobodneho stata Sakskeje móžemy někotre dróhi sporjadkować“, podšmórnje zastupowacy nawoda twarskeho zarjada města Kulowa Jurij Brösan. „Předewšěm dźe při tym wo to, asfaltowu worštu zwuporjedźeć a dźěry zapłatać.“
W Kulowje chce město Wulkoždźarowsku dróhu wot Kobrec młyna hač k wotbóčce do Brěžkow na statnej dróze S 285 wobnowić, na Augusta Bebelowej wotrězk wot křižowanišća při zakładnej šuli hač k bywšemu póstowemu zarjadej. W Koćinje chcedźa z pjenjezami z inwesticiskeje pawšale zawróćensku seklu w zadnim dźělu wsy sporjadkować. Tuchwilneho stawa puća dla dyrbi komuna spěšnje jednać. „Naprawu mjeztym hižo wjacore lěta přestorkujemy. Nětko móžemy skónčnje započeć“, Brösan rozłožuje. Małe reparatury zwoprawdźić chce město na dróze z Hózka do Koćiny. Tam su korjenje štomow jězdnju na wjacorych blakach wobškodźili.
Wutwar interneta postupuje
Pólscy dźěłaćerjo začuwaja, zo su mjez Serbami witani
Budyšin (SN/MiR). We wokrjesu Budyšin maja dalše dotal dosć njezastarane domjacnosće spěšny internet dóstać. Wokrjesny sejmik bě 2. decembra 2019 wobzamknył, přihotować wupisanje za přistup k šěrokopasmowej syći we wokrjesu. Na to staji wokrjes próstwu wo spěchowanske srědki za Cluster 10 za šule a chorownje kaž tež za přemysłowe a industrijne přestrjenje. W měrcu su wotpowědne přizwolenja Zwjazka w zarjadnistwje dóšli, zdźěli wokrjes. Próstwu wo spěchowanje přemysłownišćow a industrijnišćow pak Zwjazk hišće pruwuje. W běhu přichodnych tydźenjow chcedźa trěbne nadawki wupisać a přepodać.
Koronapandemije dla wšak njehodźi so hišće rjec, hač hodźa so planowane dźěła za wutwar terminej wotpowědnje přewjesć. Aktualne połoženje wuskutkuje so tež na hłubokotwarske předewzaća a jich kapacity. Tuchwilu koncentruja so dźěła na zjawny rum, zo njeby ke kontaktam mjez sobudźěłaćerjemi předewzaćow a wobydlerjemi dóšło. Twarske naprawy w jednotliwych domskich wobydlerjow pozdźišo nachwataja.
Koncept 2plus dale zwoprawdźeć
Wo połojčnosćach Karl-Heinz Schütze nidźo njedźerži. „Hdyž so gratu přimaš, da porjadnje“, je dewiza 61lětneho Wojerowčana. Wot 2014 do 2019 bě wón poradźowacy wobydler we Wojerowskej přiradźe za serbske naležnosće. Na to chce nawjazać. Čornochołmčanski Krabatowy młyn ma dale rosć a wuprudźeć. Model Witaj w Němčanskej pěstowarni „Pumpot“, kotraž je w nošerstwje Serbskeho šulskeho towarstwa, dyrbi dale hić. Na to nawjazowacy koncept 2plus na Handrija Zejlerjowej zakładnej šuli ma so konsekwentnje dale zwoprawdźeć. To wšo jemu na wutrobje leži. „Trjebamy serbšćinu tež na přichodnej wyšej šuli. Po móžnosći měli tam tohorunja předmjety kaž zemjepis, biologiju a stawizny w serbskej rěči podawać. Personal zawěsćić měło kultusowe ministerstwo.“
Krótkopowěsće (01.04.20)
Dalši inficěrowani
Budyšin/Zhorjelc. 180 wosobow je po wčerawšim stawje w Budyskim wokrjesu z koronawirusom natyknjenych, dźewjeć wjace hač póndźelu. 696 ludźi přebywa w karantenje. Dalši štyrjo pacienća su so wustrowili, třoch tuchwilu w chorowni zastaruja. W Zhorjelskim wokrjesu je so wčera ličba ze šěsć nowoinficěrowanymi na 75 powjetšiła. Tam je 152 wosobow w karantenje, w chorowni dźewjeć.
Nowy wokrjesny jednaćel CDU
Budyšin. Radworčan Filip Wjerš wukonja wot dźensnišeho zastojnstwo jednaćela Budyskeho wokrjesneho zwjazka CDU. Za Serba staj so wokrjesny předsyda Michael Harig a dotalny wokrjesny jednaćel a nětčiši pokładnik Thomas Israel rozsudźiłoj, po tym zo běštaj so z třomi požadarjemi rozmołwjałoj.
Nowy kulturny portal
Policija (31.03.20)
Woheń wulku wěcnu škodu načinił
Šěrachow. Wčera dopołdnja stej so na Chróstawskej dróze we Wurbisu bróžnja a domske paliłoj. Po wšěm zdaću bě woheń z tony za wotpadki wuchadźał. Wjacore wohnjowe wobory běchu zasadźene. Wěcna škoda wučinja 100 000 eurow.
Předjězbu njewobkedźbował
Budyšin. Na křižowanišću Mužakowska/Krakečanska w Budyšinje sta so njedźelu wječor wobchadne njezbožo. Wosobowe awto marki Seat Leon bě z Delnjeje Kiny přijěło, bjeztoho zo by 21lětny šofer předjězbu małotransportera marki Opel Morena wobkedźbował. Tón přijědźe ze směra Budyšin-Bórk a zajědźe do sćežora ample. 47lětna wodźerka Opela a 20lětna sobujězdźerka Seata so zraništej. Wěcna škoda wučinja něhdźe 25 000 eurow.
Namaj pobrachuje so wuchodźować
Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy takle doma abo w zahrodce činiće. Kak kreatiwni sće a što wam k přeprěčenju tohole ćežkeho časa takle do mysli přińdźe, z čim móhli so zaběrać? Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Sonja Krječmarjowa z Budyšina je so pjera jimała a piše:
Tež mój z mandźelskim smój potrjechenaj wot koronawirusa. Běchmoj na dowolu w Egyptowskej. Wróćolět bě hižo mały dyrdomdej. Dyrbjachmoj štyri dny zašo wróćo hač planowane, a potom su zabyli nas informować, hdy bus na lětanišćo wotjědźe. Dyrbjachmoj tuž 40 kilometrow z hotela do Hurghady z taksijom jěć. Lětanišćo bě kopate połne, lětadło hotowa katastrofa (stare a wuske), ale běchmoj najebać to wjesołaj, jako w Lipsku přizemichmoj – byrnjež naju awto na Drježdźanskim lětanišću stało.
