Zaměrniše medijowe kubłanje
Drježdźany (dpa/SN). Z „masterskim planom“ chce sakske kultusowe ministerstwo digitalizaciju a medijowe kubłanje na šulach pohonjeć. Medijowa kompetenca ma po dokumenće, kotryž je kultusowy minister Frank Haubitz (njestronjan) sobotu předstajił, přichodnje we wučbnych planach wšitkich předmjetow zakótwjena być. Wšitke šule maja po datowym wobjimje njewobmjezowany spěšny internetny přistup dóstać.
Rozsudne wólby trěbne
Santiago de Chile (dpa/SN). Konserwatiwny předewzaćel Sebastián Piñera je prěnje koło prezidentskich wólbow w Chile jasnje dobył, absolutnu wjetšinu pak misnył. Piñera, hižo wot 2011 do 2014 chilski prezident, docpě 36,6 procentow hłosow. Za Alejandra Guilliera, kandidata aliancy solicialistow, socialdemokratow a komunistow, hłosowaše 22,7 procentow. Mjez woběmaj budu 17. decembra rozsudne wólby. Překwapjace třeće městno docpě kandidatka lěwicarskeje koalicije Frente Amplio Beatriz Sánchez z 20,3 procentami.
Sćěhi hidy na žony dopokazane
Sonděrowanja zwrěšćili,kak nětko dale?
Berlin (dpa/SN). Dyr to w nocy w Berlinje: FDP je sonděrowanja za jamaiske zwjazkarstwo z uniju a Zelenymi zwrěšćić dała. SPD nochce jako partnerka w nuzy zaskočić. Měsacaj po wólbach zwjazkoweho sejma knježi bjezradnosć.
„Je lěpje njeknježić, hač wopak knježić“, rjekny předsyda liberalnych Christian Lindner. Tak bu zwjazkowa kanclerka Angela Merkel (CDU) do najćešeje krizy w swojej dwanaćelětnej hamtskej dobje storčena. Frakciski šef Zelenych w zwjazkowym sejmje Anton Hofreiter komentowaše reakciju FDP takle: „Z kóždym dalšim dojednanjom je so panika skerje powjetšowała hač pomjeńšiła. Tohodla móžeš bjezdwěla za to měć, zo chcychu woni mjenje wuhotować, ale su so bóle zamołwitosće bojeli.“
To a tamne (20.11.17)
Po jězbje z 0,61 promilemi alkohola w kreji dyrbi dźowka norwegskeho milionara pokutu přeličenych 25 000 eurow zapłaćić. 22lětnu maja za najbohatšu žonu Norwegskeje, nimo toho zasudźichu ju na pruwowanski čas 18 měsacow, kaž rozprawja nowina Finansavisen. Osloske sudnistwo je pokutu po dochodach 22lětneje wobličiło, při tym pak tež wolóžace fakty wobkedźbowało. Młoda žona ma zamóženje něhdźe 795 milionow eurow a by poprawom 4,2 milionaj eurow pokuty płaćić dyrbjała.
Sydlišćo Alwine ze šěsć domskimi a 15 podružnikami w braniborskim Domsdorfje ma so 9. decembra w Berlinje přesadźować. Bratraj běštaj 16 000 kwadratnych metrow wulki areal po informaciji awkcionatora po přewróće kupiłoj. Přestrjeń je po smjerći jednoho z njeju za zahajenski poskitk 125 000 eurow na předań.
Kak z wjelkom wobchadźeć?
Podstupim (dpa/SN). Wobswětowi ministrojo krajow a Zwjazka wuradźowachu dźensa w Podstupimje wo tym, kak z wjelkom dale wobchadźeć. Mjez druhim chcyše dźěłowa skupina swoje dopóznaća nastupajo wuwiće wjelčich črjódow kaž tež zastopnjowanje wjelka do směrnicow FFH předpołožić. Do toho běchu sej přirodoškitne zwjazki wěcownu debatu w naležnosći napominali, žadajo sej jednotne prawidła. Politika njesmě plahowarjow pasenskeho skotu dlěje sebi samych sebi přewostajić.
Zhubi status zastojnika
Lipsk (dpa/SN). Prawicarskeho Berlinskeho policista wotstronja z poměra zastojnika. To je zwjazkowe zarjadniske sudnistwo w Lipsku dźensa rozsudźiło. Muž ma runy a noty Horsta Wesseloweho spěwa jako tetowěrowanki, pokazuje hitlerski postrow a ma w swojim bydlenju předmjety nacijow. Mějo wšo to za zranjenje winowatosće swěrnosće zastojnika bě Kraj Berlin discipinarnu skóržbu zapodał. Policist je w prěnimaj instancomaj dobył, nětko postaji Zwjazkowe zarjadniske sudnistwo nowe měritka.
Słyša Puigdemonta
Opozicija zwěsća pola CDU deficity demokratije
Drježdźany (SN). Zeleni a Lěwica wumjetujetej sakskej uniji bytostne deficity nastupajo demokratiju. CDU pěstuje za sebje dale narok samozastupowanja za ludźi, rjeknyštaj zastupjerjej wobeju frakcijow wčera w debaće krajneho sejma wo politiskej kulturje w Sakskej.
Po słowach frakciskeho šefa Zwjazka 90/Zelenych Volkmara Zschocke je CDU w Sakskej pod něhdyšim ministerskim prezidentom Kurtom Biedenkopfom nawjazała na za čas NDR wutworjene wyšnostne myslenje. „Trjebamy ciwilnu towaršnosć, kotraž knježerstwo stražliwje kritizuje, so z nim rozestaja a jemu njepřemyslenje njedowěrja“, Zschocke rjekny.
Snano samo jutře hišće jednaja
Berlin (SN). Jednanja hač do dźensnišeho ranja w pjećich njejsu přełam w sonděrowanjach CDU, CSU, FDP a Zelenych za jamaisku koaliciju docpěli. Dźensa připołdnju su rozmołwy dale wjedli. Kaž bě z kruhow wobdźělenych zhonić, chcedźa snano tež jutře, sobotu, dale jednać. Pokerowanje stron wo swoje pozicije bě w poprawom poslednim kole jara čuwy rubjace. Kaž powěsćernja dpa rozprawja, su posrědnicy přiwšěm optimistiscy.
Šef FDP Christian Linder wuzběhny, zo móhło k zwjazkarstwu tychle štyrjoch rozdźělnych stron dóńć. Kanclerka Angela Merkel (CDU) na kóncu rozmołwow jenož rjekny: „Dobre ranje! Dźensa dale dźe.“ Předsyda CSU Horst Seehofer přizna wulke ćeže při jamaiskich sonděrowanjach, chce pak dale a bjez časoweho limita wo zwjazkarstwo wojować. Kak dołho podlěšene rozmołwy traja, „tež wot ,sudnika‘ wotwisuje“, měnješe šef Zelenych Cem Özdemir, bjez toho zo by kanclerku mjenował. „Rozsudny je wuslědk.“ Hoberske diferency mjez stronami běchu nastupajo škit klimy, přićah swójbow ćěkancow, wottwar solidarneje přiražki a na kóncu znowa při financach.
Wuzwoleny mufti zasudźeny
Xanthi (SN). K jatbje sydom měsacow je sudnistwo w grjekskich Thessalonikach minjenu póndźelu Xanthiskeho muftija Ahmeta Mete „přiswojenja zastojnstwa dla“ zasudźiło. Chłostanje bu wo tři lěta wróćo stajene. Wo tym informuje federacija Zapadothrakiskich Turkow w Europje. Jeje prezident Halit Habip Oǧlu kritizuje postupowanje grjekskeho sudnistwa: „Swoboda nabožiny turkowskeho zhromadźenstwa w Zapadnej Thrakiskej bu z wusudom jatby znowa hłuboko ranjena. Jeho prawo, postajeć swójske nabožne hłowy, je grjekski stat wot 1990 hač do dźensnišeho zapowěł.“
Ahmet Mete je wot přisłušnikow Turkow w Zapadnej Thrakiskej wuzwoleny Xanthiski mufti. Po pohrjebje za přisłušnika zhromadźenstwa, na kotrymž bě wot grjekskeho knježerstwa pomjenowany mufti přitomny, bě statny rěčnik wuzwoleneho muftija z twjerdźenjom wobskoržił, zo je sej „zastojnstwo přiswojił“ a „pomjenowaneho muftija haćił zastojnstwo wukonjeć“.
Na kromje FUEN-kongresa 2015 w Komotiniju bě mufti Mete zastupjerjow europskich narodnych mjeńšin přijał.
To a tamne (17.11.17)
Sněhběłeho łosa (Elch) w Šwedskej su runje tak před smjerću wuchowali. Zarjady běchu hižo wobzamknyli na njeho třěleć, dokelž bě wuchodźowarjow w lěsach atakował. To pak zbudźi wulke protesty. Kaž nowina Aftonbladet rozprawja, je policija rozsud nětko cofnyła, potwjerdźejo, zo njebuchu minjeny tydźeń dalše nadpady přizjewjene. Zwěrinoškitna organizacija „Djurens rätt“ je wjace hač 50 000 podpismow za wuchowanje łosa nazběrała.
Šěsć čěskich turistow je w kazachskej stolicy Astanje zasadźenje policije zawiniło. Woblečenych jako směšne kinowe figury „Borat“ w neonozelenym kupanskim wobleku a z čornej kudźerjatej periku na hłowje zadźeržachu jich zastojnicy před instalaciju „Lubuju Astanu“. Kaženja zjawneho měra dla dyrbješe kóždy 60 eurow pokuty płaćić.
Sym woprawdźe z wulkim přeswědčenjom podpisał
Luis Durnwalder je jedyn ze sydom iniciatorow wobydlerskeje iniciatiwy Federalistiskeje unije europskich nardonych mjeńšin FUEN Miniority SafePack. Bywši krajny hejtman (pola nas kaž ministerski prezident) Južneho Tirola je so wot wšeho spočatka za iniciatiwu zasadźał, z kotrejž chce FUEN Europsku uniju pohnuć, so sylnišo ze škitom mjeńšin rozestajeć. Němski dźenik w Južnym Tirolu je interview z nim wjedł a přinošk přez Zjednoćenstwo dźenikow w mjeńšinowych a regionalnych rěčach Europy MIDAS, kotremuž tež Serbske Nowiny přisłušeja, našemu wječornikej přewostajił.
Sće iniciatiwu hižo podpisał?
L. Durnwalder: Haj, a dyrbju rjec, zo sym to woprawdźe z wulkim přeswědčenjom činił.
Sće jedyn ze sydom iniciatorow wobydlerskeje iniciatiwy. Što je Was pohnuło, so za nju zasadźeć?
Nóc ma rozsudy přinjesć
Berlin (dpa/SN). Z wjacorymi zwadnymi dypkami podadźa so CDU, CSU, FDP a Zeleni do rozsudneje fazy swojich před nimale štyrjomi tydźenjemi zahajenych sonděrowanjow za jamaisku koaliciju. Nóc rozsudow ma hač do jutřišeho ranja dojednanje přinjesć. Zwada je dale wo rozsudne dypki, kaž su to přićah swójbow ćěkancow, pomjeńšenje zmilinjenja brunicy, wobchadna a financna politika. Wosebje CSU a Zeleni sej bjezkompromisnosć wumjetuja.
Tilich do Chiny po puću
Drježdźany (dpa/SN). Sakski ministerski prezident Stanisław Tilich (CDU) je so dźensa na poslednju wukrajnu jězbu swojeje hamtskeje doby podał. Delegaciji z něhdźe 90 wobdźělnikami, kotraž budźe nimale tydźeń w Chinje po puću, přisłušeja hospodarski minister Martin Dulig (SPD) a ratarski a wobswětowy minister Thomas Schmidt (CDU) kaž tež 45 předewzaćelow a wědomostnikow. Přiležnosć wopyta je dźesaćlětne partnerstwo Sakskeje z prowincu Hubei.
Siemens plany předpołožił
