Temy, nadawki, diskusija

pjatk, 28. decembera 2018 spisane wot:

Zwjazkowe předsydstwo a přihoty klětušeje hłowneje zhromadźizny

Chrósćicy (JK/SN). Hłowna zhromadźi­zna Domowiny, klětu 30. měrca w Chrósćicach, ma derje přihotowana być. Tójšto je so w minjenym času nahromadźiło, štož měli delegaća tam diskutować abo rozsudźić. To měnjachu tež čłonojo Zwjazkoweho předsydstwa Domowiny na minjenym posedźenju w Chrósćicach.

K tomu informowaše spočatnje předsyda Domowiny Dawid Statnik čłonow předsydstwa wo tym, zo wobdźěli so narodna organizacija wot nětka stajnje na wuradźowanjach komisije k strukturnej změnje we Łužicy. Tale informacija je dóšła z Drježdźanskeje statneje kenclije. Tak je zaručene, zo serbske naležnosće w komisiji tež narěča a po potrjebje wo nich wuradźuja. Rozsud čłonow strukturneje komisije, Domowinu jako stajneho wobdźělnika zapřijeć, Statnik jako gestu do praweho směra wita.

Wjace hač 150 zajimcow, mjez nimi znowa stajni hosćo z Waršawy a Minska, je wčera w Nukničanskej barace koncert pod hesłom­ „Hody nimo – punk rock fever“ wopytało. Tam wustupichu skupiny Universum z Njebjelčic (na wobrazu), Ponys auf Pump z Drježdźan a Purity Law z Niskeje. Towarstwo barakka je rjad lětsa 6. raz wuhotowało. Foto: Feliks Haza

Přikładne wustupowanje přeswědča

štwórtk, 27. decembera 2018 spisane wot:

Mjez lětušimi počesćenymi z Čestnym znamješkom Domowiny bě tohorunja Delnjoserbowka, wo kotrejž praja, zo je wažny stołp w skutkowanju tradiciskeho towarstwa w Kózlem (Casel). Rěč je wo Sybili Bertramowej.

Hižo wot časa dźěćatstwa wobdźěla so wona „z cyłej wutrobu na Kózlanskim janskim jěchanju“, zwurazni čłonka Myto­wanskeho wuběrka Domowiny Uta Henšelowa na oktoberskim wuznamjenjenskim zarjadowanju w Budyšinje. „Najprjedy bě jako holca a młoda žona w tradicionalnej młodźinskej drasće pó­dla, po tym mnohe lěta jako aktiwna čłonka towarstwa. Mjez druhim staraše so jako pokładnica wo likwidnosć cyłka a zběraše při tym wjele nazhonjenjow, z kotrymiž je nětko swojemu synej Marcelej, amtěrowacemu pokładnikej tra­diciskeho towarstwa Kózle, poradźujcy poboku“, Henšelowa wuzběhny.

Skawtska zaběra

pjatk, 21. decembera 2018 spisane wot:
Worklecy (SN). Serbscy skawća přepro­še­ja wšitkich něhdyšich a nětčišich skawtow, wšitkich zajimcow, podpěrarjow a młodostnych kaž tež swójby z dźěćimi sobotu, 29. decembra, na skawtsku hodowničku do Worklečanskeho Don Bosko­weho domu. W 15 hodź. ju z nyšporom w kapałce zahaja. Přizamknje so zabawa z rozprawami wo podawkach minjeneho lěta a z programom wjelčeje skupiny. Kónc ma tworić spěwny wječork něhdźe we 18.30 hodź. Wšitcy lubowarjo serbskeho spěwa su přeprošeni so přidružić.

Haji čiłe čěsko-serbske styki

štwórtk, 20. decembera 2018 spisane wot:

Hakle njedawno je wón w Budyšinje był a w Serbskim muzeju swoju nowu trojorěčnu němsko-serbsko-čěsku zběrku přisłowow zjawnosći předstajił. Rěču wo čěskim basniku, spisowaćelu, přełožowarju, kulturnym organizatorje a přećelu Serbow – a móhł z wopisowanjom pokročować – z Varnsdorfa Milanje Hra­balu. Jeho je Domowina lětsa z Čestnym znamješkom wuznamjeniła.

Prěni kontakt ze Serbami měješe Milan­ Hrabal hi­žo jako dźěćo. Často zetkawa so z Varnsdorskimi Serbami, předewšěm ze znatej molerku Hanku Krawcec, wo kotrejež dźěle a žiwjenju je pozdźišo knihu­ napisał. Wot swojeho nana, kiž sćěhowaše serbske rozhłosowe wu­syłanja, běše wo Serbach słyšał. „We wusyłanjach słyšeše pěsnje w jemu nje­znatej słowjanskej rěči a so nana stajnje zaso prašeše, što je to do spo­dźiwneje čě­šći­ny“, rjekny předsydka Mytowan­skeho wuběrka Domowiny Leńka Thomasowa na lětušim počesćenju w Budyskim Serbskim domje.

Wužadanja zmištrowali

wutora, 18. decembera 2018 spisane wot:

Rada Załožby za serbski lud je Zwjazkowemu předsydstwu Domowiny na posedźenju minjeny pjatk w Chrósćicach dźěławosć swojeje aktualneje doby skutkowanja předstajiła.

Chrósćicy (JK/SN). Předsydka załožboweje rady Susann Šenkec zjima wuspěšne a spomóžne dźěło gremija z jadriwymi, ale přeswědčiwymi słowami. Wone wotbłyšćowachu spokojnosć a woprawnjenu hordosć na docpěte, ale tež přeća a wočakowanja na přichodnu dobu. Jako bytostne předsydka wuzběhny, zo je so pora­dźiło dać direktorej załožby do rukow zakład­ny instrumentarij jednanja. Z nim hodźi so institucionelne spěchowanje efektiwnje přihotować a zwoprawdźić. Direktor załožby Jan Budar ma nětko organowy status, štož rěka, zo smě rozsudy na zakładźe poručenjow jeje rady tworić. Prěni wuskutk toho bě nadawk, namakać za Serbski institut nowe stejnišćo a tak zaru­čić dalšu dźěławosć předewšěm Serbskeho kulturneho archiwa.

Swětleško na kóncu tunla

póndźela, 17. decembera 2018 spisane wot:

Serbski muski chór Delany čerapa nowu­ nadźiju. Byrnjež dotal hišće žanoh­o nowe­ho wuměłstwoweho nawo­du abo nawodnicu njenamakali, su wuhlady na dirigenta dobre.

Šunow (SN). Serbski muski chór Delany ma dobre wuhlady, noweho wuměłstwoweho nawodu dóstać. To wozjewi předsyda towarstwa Janek Wowčer na pjatkownej hłownej zhromadźiznje spěwneho ćělesa w Šunowskej Fabrikskej hospodźe. „Tuchwilu z móžnym nowym dirigentom jednamy, wón pak móhł chór hakle za něhdźe poł lěta přewzać. Rozsud budźe najzašo klětu w februarje. Přiwšěm mam to za swětleško na kóncu tunla“, rozłoži Wowčer našemu wječornikej. Do­kelž­ hišće jednaja, no­chcyše wón rjec, wo koho so při tym jedna­.

Na pjatkownej zhromadźiznje, kotraž bě zdobom adwentnička delanskeho chóra, bilancowachu mužojo dźěławosć lońšeho lěta. „Njejasneho wuměłstwoweho nawodnistwa dla smy lětušu hłownu zhromadźiznu wot januara stajnje zaso­ přestorkowali w nadźiji, zo tola hišće prjedy noweho dirigenta namakamy“, Janek­ Wowčer wujasni.

Kontinuita dale trěbna

póndźela, 17. decembera 2018 spisane wot:
Z hornjoserbskeje strony je kontinuita za skutkowanje­ noweje załožboweje rady zaručena. Třom jeje tuchwilnym rjadnym čłonam je Zwjazkowe předsydstwo Domowiny minjeny pjatk w Chrósćicach znowa dowěru wuprajiło. Tež mjez zastupowa­cy­mi radźićelemi je wosoba, kotraž so jako prosta započatkarka do wólbneje periody 2019–2023 njepodawa. Štyrjom nazhonitym čłonam steji tuž samsna ličba nowych napřećo. Spomóžne to wuchadźišćo, zo móža Serbja dotalny, pod aktualnej předsydku rady Susann Šenkec, kročeny kurs dale wjesć. Wosebje z widom na trěbne nowe financowanske zrěčenje Zwjazka z krajomaj Sakskej a Braniborskej je to jara wažne. Za dalše palace wužadanja předewšěm nastupajo našu maćeršćinu, rěčne rumy abo prašenja digitalizacije maja radźićeljo sobu rozrisanja zdźěłać. Za to je wěda nazhonitych hromadźe z čerstwymi myslemi radźićelow-nowačkow płódny zakład.­ Wšako trjebamy kontinuitu, a to tworićelsku. Axel Arlt

Wudospołnjenje

pjatk, 14. decembera 2018 spisane wot:

Chrósćicy (SN/at). Z namjetom wo wudospołnjenje dnjoweho porjada za posedźenje Zwjazkoweho předsydstwa Domowiny dźensa w Chrósćicach chce Marcel Brauman, čłon prezidija a nawoda wuběrka za kubłanje, tam aktualnu temu rozjimać, kotraž je serbsku zjawnosć tola tróšku překwapiła. „Serbski institut resp. serbske institucije do stareje póstownje w Budyšinje?“ rěka prašenje, z kotrymž měło so předsydstwo we wobłuku dypka 4 dnjoweho porjada – Rezimej dźěławosće załožboweje rady w dobje 2015–2019 a wuhlad na nadawki w nowej wólbnej periodźe 2019–2023 – zaběrać.­ Tak bychu tuchwilni radźićeljo, kandidaća za hornjoserbske městna w załožbowej radźe, ale tež zajimowani hosćo šansu měli so k tomu wuprajić, kaž piše Marcel Brauman w swojim blogu. Wšako wuzwoli zwjazkowe předsydstwo w přichodnym dypku dnjoweho porjada štyrjoch rjadnych čłonow a jich zastupjerjow załožboweje rady.

Dohodowne pěsnje zanjesli

štwórtk, 13. decembera 2018 spisane wot:
Rakečanska Serbska bjesada je wčera wječor na zarjadowanje „žiwy adwent“ do farskeje bróžnje přeprosyła. Nimo wosadnych běchu mjez wobdźělnikami tež někotři čłonojo Domowinskeje skupiny Komorow/Rakecy/Trupin a dalši zajimcy. Po tym zo je dr. Günter Holder (nalěwo) wšitkich postrowił, spěwachu woni zhromadnje dohodowne kěrluše. Andreja Langerowa to na gitarje přewodźeše. Horce wino a čaj so k poprjančkam derje hodźeštej. Wjeselo wobradźi runje tak hódančko, kotrež mějachu wuhódać. Prawa wotmołwa rěkaše „božodźěsćowy štom“. Dźensa wječor budźe w Bukecach serbski „žiwy adwent“ tamnišeje Bjesady. Foto: Feliks Haza

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND