Statnik: Smy krótko před cilom

štwórtk, 22. měrca 2018 spisane wot:

Wojerecy (SN/JaW). Prezidij Zwjazkoweho předsydstwa Domowina je so wčera nadrobnje z aktualnym stawom woby­dlerskeje iniciatiwy Federalistiske unije europskich narodnych mjeńšin (FUEN) Minority SafePack zaběrał. „Wjeselimy so, zo je iniciatiwa mjeztym jedne žadanje spjelniła a w sydom krajach trěbnu ličbu podpismow docpěła. Přiwšěm pobra­chuje hišće něšto wjac hač 60 000 sig­numow, zo bychmy trěbny milion docpěli. Smy potajkim krótko před cilom“, rozłoži předsyda Domowiny Dawid Statnik­. Zdobom wón hišće raz wšitkich naležnje namołwja akciju podpěrać a skedźbnja zdobom na to, wšitke dotal zezběrane podpisma w přichodnych dnjach Domowinskemu zarjadej w Budyšinje přepodać. Domowina je wot lěta 1990 z čłonom FUEN a sylnje za woby­dlersku iniciatiwu wabi.

Myto Hórnika gymnaziastej

srjeda, 21. měrca 2018 spisane wot:

Budyšin (SN/bn). Předsyda Maćicy Serbskeje Jurij Łušćanski, jeje městopředsydka dr. Anja Pohončowa a čłonka předsydstwa dr. Ines Kellerowa spožčichu wčera spěchowanske Myto Michała Hórnika Fabianej Neterej. Šulerja Serbskeho gymnazija Budyšin wuznamjenichu za jeho fachowe dźěło „Přesćěhanje Židow w času nacionalsocializma we Łužicy wot 1933 do 1945 na přikładźe swójby Nussenbaum z Budyšina“. Awtor bě za to fachowu literaturu intensiwnje a dokładnje wuhódnoćił, nimo toho wustupuja časowi swědcy. Byrnjež nastawk wšitkim kriterjiam, kotrež Maćica předpisuje, njewotpowědował – wupisanje žada sej mjez druhim tematisce serbski wobsah, kotryž pak lawreat bjezposrědnje wob­kedźbował njebě –, je so hódnoćacy wuběrk towarstwa wědomostneje akuratesy a rěčneje kwality dla na kompromis dojednał. Fabianej Neterej přizwoli tuž připóznawanske Myto Michała Hórnika ­we formje wopisma, je pak dotěrowanu sumu społojčił.

Do dźěła zdar!

srjeda, 21. měrca 2018 spisane wot:
Maćica Serbska wuznamjeni lětsa dweju łužiskeju šulerjow ze spěchowanskim mytom. Nažel njebu ze stron studowacych resp. nowych absolwentow kmane fachowe dźěło zapodate, tak zo njemóže Myto Arnošta Muki spožčić. Scyła bě wobdźě­lenje na wot lěta 2011 prawidłownje wupisanym wurisanju dotal skerje snadne. To zadźiwa, wšako njejstej ani serbšćina jako rěč ani temowy wobłuk předpisanej. A cyłkownje 1 200 eurow, kotrež Maćica dobyćerjam w najlěpšim padźe přizwoli, měło dorostowych wědomostnikow přidatnje motiwować. Na forumje „Přichod Budyšin“ su zwěsćili, zo we Łužicy hladajo na slědźenje a inowaciju klaca – z hospodarskeho wida. Ćim bóle dyrbjeli so tuž na polu humanistiskich wědow angažować a kompetency spěchować. Kreatiwne ideje na wšitkich runinach trjebamy. Poskitk je tu. Lubi šulerjo a studenća: Hlej nadpis! Bosćan Nawka

Pěstuja dobru zhromadnosć

srjeda, 21. měrca 2018 spisane wot:
Jedne z najaktiwnišich wjesnych towarstwow na teritoriju zarjadniskeho zwjazka Při Klóšterskej wodźe je zawěrno Nowowješćanske. Wone organizuje w běhu lěta njeličomne zarjadowanja za wobydlerjow, někotre pak tež za swojich čłonow. Tak je so tele dny 14 žónskich z towarstwa z awtami do Brětnje podało. Bě to takrjec trochu zapozdźene zetkanje k dnjej žonow. W Brětni mějachu bowlingowej čarje skazanej, hdźež dwě hodźinje z połnym zapalom kule kulachu a připódla rjenje bjesadowachu. Na to hišće zhromadnje powječerjachu. Foto: Petra Šwejdźina

Wo pomniku Andrickeho naležnje rěčeli

wutora, 20. měrca 2018 spisane wot:

Ralbicy (SN/MkWj). Pomnik za zbóžnoprajeneho kapłana Alojsa Andrickeho je Towarstwu Cyrila a Metoda dale wažne předewzaće a wostanje – kaž so wčera wječor na hłownej zhromadźiznje TCM w Ralbicach zaso pokaza – přiwšěm dosć emocionalna naležnosć.

Hižo na lońšej „hłownej“ towarstwa w Kulowje bě pomnik debatu zbudźił. Dr. Pětr Brězan ze Sulšec a jeho bratr dr. Jan Brězan z Drježdźan běštaj projekt předstajiłoj. Jeju předstawy: Pomnik Alojsa, wulki kaž čłowjek, steji měšnisku sutanu woblečeny před Róžeńčanskej swjatnicu a strowi přichadźacych putnikow. Bratraj běštaj model sobu přinjesłoj, organizatoriske prašenja w dalokej měrje hižo zrjadowałoj a samo pólskeho rězbarja za nadawk zdobyłoj. Dokelž pak je to mnohim prosće přespěšnje šło, loni w Kulowje rozsudźichu wutworić dźěłowu skupinu, kotraž ma so předewšěm z formu pomnika zaběrać a wjacore wuměłske na­mjety pruwować.

Najstarše towarstwo dale čiłe

póndźela, 19. měrca 2018 spisane wot:

Budyšin (SN/bn). Na hłownej zhromadźiznje Maćicy Serbskeje sobotu na žurli Budyskeho Serbskeho muzeja je něhdźe 40 čłonow wědomostneho towarstwa rozprawje předsydy a pokładnika jednohłósnje schwaliło. Po mjeńšinje ćišiny za loni zemrěteju wjelelětneju sobustawow dr. Siegmunda Musiata a dr. Zbigniewa Gajewskeho wupraji so předsyda Jurij Łušćanski k dźěławosći towarstwa. „Jubilej ‚500 lět reformacija‘ je tež nas Serbow zaběrał. Na iniciatiwu serbskeho superintendenta Jana Malinka nasta kedźbyhódna kniha ‚Pjeć lětstotkow – Serbja a reformacija‘, ke kotrejž su nimo předsydki wuběrka za serbske pomniki Trudle Malinkoweje tež dalši čłonojo ze zajimawymi nastawkami přinošowali. Zawěsće njepřehnawam, hdyž mam wudaće za wusahowacy podawk lěta“, předsyda rjekny. Nimo toho wuzběhny wón prócowanja Maćicy wo wutworjenje pomnika za dekana Johanna Leisentritta w Budyšinje. Maćica Serbska ma „tuchwilu 106 sobustawow, mjez nimi dwanaće wukrajnych. Z towarstwa wustupiła je jedna wosoba, přistupili su tři.“

Spektrum skutkowanja sej zbližili

póndźela, 19. měrca 2018 spisane wot:

Radwor (SN/MkWj). „Tajkich prócowarjow bychmy dźensa nuznje trjebali.“ ­Facit Ludmile Budarjoweje drje měješe něchtóžkuli we hłowje, jako po wopominanskim zarjadowanju składnostnje 50. posmjertnin Michała Nawki minjeny pjatk w Radworju zaso domoj dźěše. Wjace hač połsta zajimcow bě na zarjadowanje na wosadnu žurlu přichwatało, na kotrež běštej Towarstwo Cyrila a Metoda a Maćica Serbska přeprosyłoj.

W krótkopřednoškach zhonichu wopytowarjo wo hoberskim spektrumje skutkowanja Radworčana, kiž bě 16. měrca 1968 zemrěł. Ludmila Budarjowa rozprawješe, kajke problemy mě­ješe „pilny a chrobły serbski prócowar“ z nacionalsocialistami a pozdźišo ze socialistiskej wyšnosću, dokelž nochcyše so statnej liniji podwolić. Tak bě Nawka jedyn z prěnich, kiž dyrbješe 1937 na ćišć nacijow swoju serbsku domiznu wopušćić. Nacionalsocialisća přesadźichu jeho do Kamjenicy.

Na Michała Nawku spominali

pjatk, 16. měrca 2018 spisane wot:
Čłonojo Maćicy Serbskeje a mnozy dalši su dźensa dopołdnja na Budyskim Mikławšku Michała Nawku wopominali. Wučer, kěrlušer a basnik, kiž bě tohorunja redaktor Katolskeho Posoła, je před 50 lětami zemrěł. Dźensa wječor přewjedźe Towarstwo Cyrila a Metoda z Radworskej wosadu a Maćicu Serbskej w Radworju za njeho spominanske zarjadowanje, kotrež započnje so we 18.30 hodź. z Božej mšu. Po kemšach zhladuja na tamnišej farje z wjacorymi přednoškami na žiwjenje a skutkowanje prócowarja, kiž je serbskim wěriwym, katolskim kaž ewangelskim, tójšto kěrlušow zawostajił. Foto: SN/Maćij Bulank

Młodych ludźi do chóra wabić

pjatk, 16. měrca 2018 spisane wot:

Radwor (SN/MkWj). Runja druhim spěwnym ćělesam chce tež Radworski chór Meja zaměrnje za dorostom pytać a młodych ludźi za sobuspěwanje zdobyć. To předewzachu sej na swojej wčerawšej hłownej zhromadźiznje w Radworskim „Słodeńku“, domicilu chóra. Činić chcedźa to mjez druhim z wosebitej probu, na kotrejž maja zajimcy składnosć, do chóroweho žiwjenja „ponuchać“.

Hewak móžachu na dosć wuspěšne minjene lěto zhladować. Tak su Mejenjo w oratoriju „Serbske jutry“ sobu skut­kowali a jón w meji tež w Drježdźanskej katedrali přednjesli. Tradicionalne zarjadowanja, kaž koncert před Starej cyrkwičku, loni zhromadnje z chórom towarstwa Bratrowstwo, abo hodowny koncert z Měćinom Weclichom a młodymi wuměłcami, běchu tohorunja jara radźene, kaž městopředsydka Diana Wowčerjowa w rozprawje zwěsći. Tež sportowcy Meje su někotryžkuli wuspěch wuwojowali. Dźak wuprajichu Pětrej Cyžej, kiž jich mjeztym dźesać lět diriguje.

Z chórom Lipa chcedźa dale na klětu planowanym oratoriju ­„Israelowa zrudoba a tróšt“ hromadźe dźěłać.

Kulturne towarstwo dwaceći lět

štwórtk, 15. měrca 2018 spisane wot:

Bukečanske kulturne spěchowanske ­towarstwo swjeći zajutřišim, sobotu, 20lětne wobstaće. Wone so we wsy ­tohorunja wo někotrežkuli serbske ­zarjadowanje stara.

Bukecy (CS/SN). Po swojej lětnej hłownej zhromadźiznje sobotu w 15 hodź. zhladuje Bukečanske kulturne spěchowanske towarstwo na 20. róčnicu załoženja. ­Wu­tworili su je w aprylu 1998. Wone wuńdźe tehdy z přihotowanskeje skupiny za 775. jubilej Bukec, kotryž su 1997 wo­swjećili. Po tym zo běchu jubilejny swjedźeń wuspěšnje přewjedli, wob­dźěleni měnjachu, zo je wažne, wuprudźenje, kotrež bě swjedźeń na wjes a region měł, do přichoda wjesć. Tuž wobzamknychu towarstwo załožić. 18 rjadnych a dwaj spěchowanskaj čłonaj jemu spočatnje přisłušachu. Mjeztym je ličba na 30 rozrostła.

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND