Prezident kulturneje stolicy Europy 2016 dr. Rafał Dutkiewicz sej přeje, zo bychu ludźo spokojni a wotewrjeniši byli
Klětu budźe pólske město Wrócław kulturna stolica Europy. Na to je so susodne pólske město dołho přihotowało. Wjele noweho je tam nastało a njesměrnje bohaty budźe kulturny poskitk, kotryž móža tež Serbja a Němcy z Łužicy wužiwać. Alfons Wićaz je so z prezidentom města Wrócławja dr. Rafałom Dutkiewiczom rozmołwjał.
Knježe prezidento, wy sće hižo před lětami w pólskim wulkopósłanstwje w Berlinje wo tym rěčał, zo so Wrócław za kulturnu stolicu Europy požada. Što je Was tehdy k tomu pohnuło?
R. Dutkiewicz: Sprěnja wěrju do kultury. Chcemy-li so wuwiwać a zwoprawdźeć, dyrbimy tole přez a w kulturje činić. Přidatnje wobsteji znata korelacija mjez kulturu a inowaciju. A tule chcemy moderne, inowatiwne město tworić. Tohodla tónle strategiski rozsud za kulturu.
Wašej próstwje za lěto 2016 bu přihłosowane. Što je tole w prěnim wokomiku za Was a wobydlerjow města woznamjenjało?
