Zeleni chcyli tež z wulkej koaliciju zamołwiće hromadźe dźěłać

Berlin/Kiel (dpa/SN). Zeleni su po słowach předsydki swojeje frakcije w zwjazkowym sejmje Katrin Göring-Eckardt zwólniwi, knježerstwowu zamołwitosć přewzać. Při jednanjach wo wulku koaliciju „móhła ćežka situacija nastać. A tohodla potwjerdźam, zo žane rozmołwy njewotpokazamy“, rjekny Göring-­Eckardt w rozhłosu. Lěta wulkeje koalicije CDU, CSU a SPD budu po jeje měnjenju „chětro chabłace“. Za Zelenych to rěka: „Smy kóždy čas zwólniwi, pak k wólbam pak tež k hinašim roz­mołwam.“

Göring-Eckardt doda: „Budźemy programatisce přihotowani. A mamy lóšt, w kraju něšto změnić.“ Na prašenje, hač móhła sej nowe jednanja k wutworjenju tak mjenowaneje jamaiskeje koalicije předstajić, wona rjekny, zo to ani ze stron zwjazkoweje kanclerki Angele Merkel (CDU) ani ze stron předsydy FDP Christiana Lindnera njewočakuje.