Prěnje zetkanje přiradyměsta Budyšin
Budyšin (CS/SN). Nowa přirada za serbske naležnosće města Budyšin je so wčera na swoje konstituowace posedźenje zešła. Kaž su na zašłym posedźenju měšćanskeje rady wobzamknyli, wobsteji přirada ze štyrjoch měšćanskich radźićelow a pjeć wěcywustojnych wobydlerjow sprjewineho města kaž tež z jich zastupjerjow. Předsyda přirady je Budyski wyši měšćanosta Karsten Vogt (CDU). Gremij poradźuje wyšeho měšćanostu hladajo na wšě serbske naležnosće. Nimo toho je Vogt narěčenskeho partnera w měšćanskim zarjadnistwje pomjenował, Andréja Wuchta. Přirada so jónu w kwartalu schadźuje. To je časćišo, hač w dotalnym dźěłowym kruhu. Lětnje dyrbi přirada rozprawu měšćanskej radźe předpołožić, tež w serbskej rěči.
Stary zwjazkowy sejm so zešoł
Berlin (dpa/SN). Něšto dnjow do konstituowanja noweho zwjazkoweho sejma je so stary zwjazkowym sejm dźensa w Berlinje hišće raz zešoł. Tam chcychu wo změnje zakładneho zakonja wuradźować, kotruž nowa koalicije CDU/CSU a SPD planuje. Z reformu chcedźa dotal płaćiwu mjezu zadołženju zběhnyć a sta miliardow eurow do brónjenja inwestować. Nimo toho planuja fonds za přidatne inwesticije do infrastruktury.
Putin pola wojakow w Kursku
Kursk (dpa/SN). Ruski prezident Wladimit Putin je hladajo na wuspěšnu přećiwnu ofensiwu ruskeho wójska w kónčinje južnje Kurska tamniše wojerske jednotki wopytał. W rozkazowanišću krizoweje kónčiny wón jednotkam přikaza, tež poslednje ukrainske jednotki wućěrić. Te běchu loni w awgusće njewočakowano ofensiwu zahajili a dźěle regiona wobsadźili. Ruske wójsko je mjeztym w dalokej měrje zaso wutłóčiło a sta ukrainskich wojakow zajało.
Koaliciske jednanja zahajene
Z popjełowym sprayjom postupuje policija w Argentinskej přećiwo ...
Wjace pjenjez za zakitowanje!
Berlin (dpa/SN). Wuznamni wědomostnicy Němskeje namołwjeja CDU/CSU, SPD, Zelenych a FDP, so na zwyšenje wudawkow za zakitowanje dorozumić. „Dojednajće so!“, rěka w apelu, kotryž běchu politologojo Carlo Masala, Christian Mölling a Claudia Major nastorčili.
Prašenje financowanja němskeje a europskeje wěstoty njedowola žane wahanje abo taktěrowanje. Wědomostnicy su sej wěsći, zo steji swět přez historiskimi łamkami. Swětowy porjadk, swoboda, derjeměće a měr su wohrožene, tak w lisće steji. Prezident USA Donald Trump chce Europu hospodarsce zničić. Ruska chce kontinent wobknježić a podrywać. „Z toho wurosće historiska zamołwitosć Němskeje“, dale pisaja.
Scholzej so dźakował
Delegacija USA po puću do Moskwy
Moskwa (dpa/SN). W zwisku z debatu wo móžnym 30 dnjowskim přiměrje w Ukrainje su posrědnicy USA po puću do Moskwy. Tole zdźěla rěčnik Krjemla Dmitrij Pjeskow. Přiwšěm je pak hišće přezahe, poziciju Moskwy w tutym prašenju zjawnje zwuraznić, wón rjekny. Dotal je Ruska nachwilny přiměr w Ukrainje stajnje zaso wotpokazała a sej zasadne rozrisanje konflikta žadała.
Wonkowny minister Sergej Lawrow Ukrainje wumjetuje, zo chcyła přiměr za přerjadowanje swojich wojerskich jednotkow wužić a je z pomocu zapada za dalši bój přećiwo Ruskeje zaso wobrónić.
Posrědnicy USA chcedźa Rusku wo rozmołwach mjez Ukrainu a zastupnikami USA w Sawdi-Arabskej informować, kotrež běchu tam minjene dny wjedli. Ukraina bě swoju zasadnu zwólniwosć za přiměr zwurazniła, jeli Ruska tomu tohorunja přizwoli.
Ruski prezident Wladimir Putin chcyše w běhu dnja na nowinarskej konferency swoje stejišćo wozjewić. Dokładny čas zarjadowanja njebě dopołdnja hišće znaty.
Wokrjes jednanja njekmany
Zhorjelski krajny rada warnuje po wotpokazanju etata 2025 před sćěhami
Zhorjelc (AK/SN). Zo je wokrjesny sejmik Zhorjelskeho wokrjesa etat 2025 wotpokazał, změje daloko sahace sćěhi. Tole je krajny rada dr. Stephan Meyer (CDU) předwčerawšim, wutoru, hišće raz potwjerdźił. „Njemóžemy swoje zakonske nadawki a běžne winowatosće wjace spjelnić“, wón rjekny. Potrjechene su mjez druhim inwesticije do dróhotwara w Rózbórku, Žitawje a Jonsdorfje. Trěbne twarske naprawy w powołanskimaj šulskimaj centromaj w Žitawje a Lubiju su runje tak blokowane kaž w gymnazijomaj w Běłej Wodźe a Wodowych Hendrichecach. Tež inwesticije do wuchowanskich słužbow w Ochranowje, Žitawje, Mikowje a Habrachćicach dyrbja čakać. Wokrjesny sejmik bě na swojim posedźenju 5. měrca naćisk etata wokrjesa wotpokazał. Wokrjes bě sejmikej etat z deficitom 166 milionow eurow předpołožił a so nadźijał, zo sakske krajne knježerstwo minus wuruna.
Młódši přewozmu
Statne rěčnistwa přećežene
Drježdźany (dpa/SN). Justicna ministerka Constanze Geiert žada sej pomoc za chětro přećežene statne rěčnistwa. „Situacija je wjace hač napjata“, rjekny politikarka CDU powěsćerni dpa hladajo na spochi přiběrace ličby přepytowanjow, kotrež ma statne rěčnistwo wobdźěłać. Po informacijach ministerstwa pobrachuja statni rěčnicy. Dźěłowe poćeženje statnych rěčnistwow je zdźěla jara wulke. Jeničce minjenej lěće je 50 000 nowych přepytowanskich padow dóšło. Tuchwilu kopi so w statnych rěčnistwach 271 500 padow. Cyłkownje 440 statnych rěčnikow chłostajomne njeskutki přepytuje. Z tym su 86 procentow městnow wobsadźili. Loni móžachu nimale 267 000 padow wobdźěłać.
Situacija přiwótřa so wosebje padow w zwisku z azylowym zakonjom dla. Tola tež ličba padustwow, ranjenja ćěła a płokanja pjenjez přiběra. Nic naposledk postara so tež nowy zakoń cannabisa wo přidatne dźěło. Justica bědźi so z „rjemjeslnisce špatnje zdźěłanymi zakonjemi“, kotrež zawinuja tójšto napinanja ze snadnym wuspěchom přećiwo drogowej kriminaliće.
