Budyšin/Drježdźany (SN/MkWj). Serbski zapósłanc Lěwicy w Sakskim krajnym sejmje a rěčnik frakcije za narodne mjeńšiny Hajko Kozel zaběra so hižo dlěši čas z prašenjom, čehodla njeje we Łužicy wjace serbskorěčnych policistow.
Hižo w januaru 2007 naprašowaše so zapósłanc tuž pola statneho knježerstwa w krajnym sejmje za kmanymi naprawami, hač njemóhli wjace policistow ze serbskorěčnymi kmanosćemi w serbskim sydlenskim rumje zasadźić. Tak su jemu přilubili problem rozrisać. Posledni króć činješe to tehdomniši Zhorjelski policajski prezident Conny Stiehl w lěće 2016, kaž Kozel w nowinskej zdźělence informuje.
