Načolne gremije socialdemokratow chcyli Andreju Nahles za předsydku

Berlin (dpa/SN). Jako prěnja žona na čole SPD ma předsydka frakcije Andrea Nahles stronu z hłubokoje krizy wjesć. Dotalny předsyda Martin Schulz je wčera oficialnje wotstupił. Na to nominowachu načolne gremije strony 47lětnu Nahles jednohłósnje za jeho naslědnicu. Hač k wólbam na wurjadnym stronskim zjězdźe 22. apryla we Wiesbadenje ma městopředsyda Olaf Scholz socialdemokratow komisarisce nawjedować. Pospyty, Andreji Nahles hnydom zastojnstwo předsydy dowěrić, běchu po protestach wjacorych krajnych zwjazkow zwrěšćili.

Nahles mjenowaše swoje nominowanje „wulku česć a wulku zamołwitosć za naš kraj“. Wona so nadźija, zo wuchadźa ze stronskeho zjězda „signal rozmacha“. Zdobom zakituje wujednane koaliciske zrěčenje. Dale je sej wěsta, zo čłonojo strony při swojim wotumje wot 20. febraura hač do 2. měrca z „haj“ hłosuja. Na prašenje žurnalistow, hač swój politiski přichod z wuslědkom wothłosowanja zwjazuje, Nahles rjekny: „Swój dóńt ze scyła ničim njezwjazuju.“