Tradicionalnje wotměwa so posledni nazymski koncert kóždeho lěta dźeń do pokutneho dnja w Pančicach-Kukowje. Zawčerawšim dožiwichu tam spěwny wječor, kiž bě jara ludowy a zabawny.
Pančicy-Kukow (SN/MWj). Kaž na mnohich dalšich nazymskich koncertach bě „Ha widźu-li ptačata ćahnyć“ tež prěni spěw na lětušim poslednim nazymskim koncerće, kotryž wuhotowa chór Kulowskeho Bratrowstwa hromadźe z dźěćacej šolu Kulowskeje wosady wutoru w Pančičansko-Kukowskej Starej hospodźe. Kaž předsyda tamnišeje Domowinskeje skupiny Pětr Korjeńk při witanju rjekny, móžachu Kulowske spěwne ćěleso po 15 lětach zaso raz nazymski koncert we wsy witać. Pod dirigatom Franka Čórlicha zaklinčachu w prěnim dźělu jendźelski duchowny spěw w serbskej wersiji, hymna swětoweho zetkanja młodźiny w Krakowje a ludowej twórbje, mjez druhim z přewodom dirigenta na akordeonje.
