Wulke Ždźary (AK/SN). Lětuši dwanaty Serbski ewangelski domizniski dźeń Wojerowskeho­ regiona budźe njedźelu, 23. junija, we Wulkich Ždźarach. Městnosći stej tamniša cyrkej a Krabatowy nowy wu­dwór. „Tak mamy dobre wuměnjenja, zo so dźeń derje poradźi. Zapřijeć chcemy wjesnu radu, wosadnu cyrkwinsku radu, pěstowarnju, chóry a dalšich partnerow“, podšmórny farar Heinrich Koch, čłon ­serbskeho ewangelskeho dźěłoweho kruha. Jeho čłonojo schadźo­wachu so minjeny tydźeń we Wulkich Ždźarach prěni raz w nowym lěće.