Mättigowa załožba wupisa lětsa znowa stipendij za wědomostny dorost. Nimo toho chce kónc lěta restawraciju Mättigoweho epitafa w tachantskej cyrkwi zakónčić.

Budyšin (SN/bn). „Dohromady dźesać stipendiatow smy po nowozałoženju našeje institucije w lěće 2007 pjenježnje podpěrali. Tak pokročujemy z tradiciju spěchować wědomostny dorost, slědźacy wo stawiznach Hornjeje Łužicy. Cyłkownje su wot lěta 1649 wjace hač tysac studentow přiražku dóstali, někotrežkuli nade wšo zajimawe dźěło hewak najskerje wušło njeby“, zjima předsyda Mättigoweje załožby dr. Uwe Koch wčera na nowinarskej konferency w Budyskim wosadnym domje swj. Pětra. Wosebje wuzběhny wón „młodu serbsku inteligencu, kotrejž je załožba něhdy přistup na gymnazij a studij zmóžniła“. Přikład bě jemu mjez druhim załožer uniwersitneje biblioteki w Jenje Christian Gottlieb Buder, rodźeny w Ketlicach a serbskeho pochada. „Z dźensnišim stipendijom wolóžamy­ kandidatam na přikład publikaciju wědomostnych knihow“, Uwe Koch naspomniwši dr. Lubinu Malinkowu a dr. Friedricha Pollacka doda.