Nowy serwis na folklornym swjatku „Łužica 2019“ – předpředań zahajena

Budyšin (SN/bn). Měsac do zahajenja lětušeho XIII. mjezynarodneho folklorneho festiwala „Łužica 2019“ je přihotowanski wuběrk wčera w Budyšinje wuhibki za swjedźeń dokładnišo stajił. Tak poskića lětsa sobotu a njedźelu prěni króć tak mjenowany shuttle serwis – w krutym rytmusu pojědu busy z Budyšina přez Radwor kaž tež z Kamjenca do Chrósćic a wróćo. Partneraj swjatk wuhotowaceje Domowiny w tym zwisku stej zaměrowy wobchadny zwjazk Hornja Łužica-Delnja Šleska ZVON kaž tež wobchadny zwjazk Hornje Łobjo VVO. Dalša nowinka je, zo budźe njedźelniši program wobšěrniši hač před lětomaj. Wosebje zakónčenje ma rozrosć, tak zo móža so wšitcy wobdźěleni wuměłcy ze swjedźenskim ćahom hišće raz prezentować a z publikumom dostojnje rozžohnować.