Róžant (TŠo/SN). Njewšědnu knižnu premjeru dožiwichu Róžeńčanki a Róžeńčenjo na najdlěšim dnju lěta. Na Glawšec statoku wosrjedź wsy předstaji Diana Šołćina njedawno jako licencne wudaće w Ludowym nakładnistwje Domowina wušłu dźěćacu knihu „Findus a hara z honačom“. Wona bě tekst šwedskeho awtora Svena Nordqvista do hornjoserbšćiny přełožiła a předčita někotre wujimki z nowostki.
Při najrjeńšim wjedrje dožiwi minjeny pjatk něhdźe 80 dźěći ze staršimi na wulkotnje po ilustracijach Nordqvista wuhotowanym statoku šwedske popołdnjo. Nimo čitanja słušachu kołbaski w całće runje tak k tomu kaž cymtowe zawitki. Samo Pettersson a Findus, sćělesnjenaj wot Pětra Brězana respektiwnje Bena Šołty, kaž tež kokošce z jeju statoka dźěći z překwapjacym wustupom zawjeselichu.
Zajim za serbsku nowostku bě tak wulki, zo na předań poskićene eksemplary ani njedosahachu. W Budyskej Smolerjec kniharni pak maja publikaciju hišće na składźe.
