Chrósćicy/Budyšin (SN/pdź). „Hišće jónu dźěćo być“ – to njeje jenož són mnohich dorosćenych, ale tež titul noweho spěwa Józefa Donata. 21lětny Chróšćan, kotryž studuje tuchwilu wučerstwo w Lipsku, njeje w swěće serbskeje hudźby cyle njeznaty. Za jeho młodźinski kěrluš „Hladaj a wěr!“ spožčichu jemu před lětomaj druhe myto serbskeho songwriting wubědźowanja dekanatneje młodźiny. Loni doby z kěrlušom samo komponowanske wubědźowanje Drježdźansko-Mišnjanskeho biskopstwa.

„To běše zdobom start mojeje tworićelskeje karjery“, Donat rozprawja. „Wot dźěćatstwa sem drje hižo hudźbu činju, spěwam rady a wobknježu wjacore instrumenty, tola z komponowanjom a pisanjom swójskich spěwow započach so hakle zašłe lěta zaběrać.“ A to chětro wuspěšnje. Po jeho wuspěchu na runinje Drježdźansko-Mišnjanskeho bis­kopstwa přizjewi so Budyske MDR-studijo pola młodeho hudźbneho talenta. Woni woprašachu so, hač je zajimowany na profesionelnym nahrawanju swojeho spěwa. Józef Donat běše nablaku zahorjeny. Wón wuži zdobom składnosć a předstaji rozhłosownikam někotre dalše z jeho kompozicijow.