Theodor Fontane a jeho poćah k Serbam

Budyšin (SN/CoR). Z wothłosom na wosebitu wustajeńcu składnostnje 200. narodnin spisowaćela Theodora Fontany (30.12.1819 – 20.9.1898) „Der Spreewald – ein landschaftliches Kabinett-Stück“ w Choćebuskim měšćanskim muzeju, kotraž bě hač do minjeneje njedźele widźeć, je nawoda Měšćanskich zběrkow Choćebuz Steffen Krestin jara spokojom. „Přehladku su mnozy wopytowarjo wćipnje a pozitiwnje přiwzali. Naš koncept je so wudanił. Z jězbu Fontany za­poča so turizm w Błótach, a to smy jako wuchadźišćo wužiwali, zo bychmy změny wšědneho dnja wobydlerjow kaž tež turizma hač do přitomnosće wotbłyšćowali“, praji Krestin na naprašowanje SN. Wustajeńca nasta w kooperaciji ze Serbskim muzejom Choćebuz, hłowne teksty běchu w delnjoserbskej a němskej rěči. Bě to jedne z něhdźe 450 zarjadowanjow, kotrež je Braniborska pod hesłom „fontane.200“ z dohromady 1,87 milionami eurow spěchowała.