Štyri serbskorěčne činohrajne a jedna klankodźiwadłowa produkcija

Budyšin (SN/MiR). Regionalne wosebitosće w globalnym swěće sej zachować, druhdy sej tajke wotkryć a sej domiznu jako hódnu zbližić je za Budyske Němsko-Serbske ludowe dźiwadło předchadźacu hrajnu dobu sćěhujo tež w sezonje 2019/2020 ćežišćo hrajneho plana. „Dźiwadło prócuje so, w małym namakać to wulke, swětej so wotwěrace“, zwurazni intendant NSLDź Lutz Hillmann wčera na nowinarskej konferency we hłownym domje dźiwadła. „Pokazać chcemy na to mjez druhim z molowanskim projektom ,Wokno do přichoda‘. Tuchwilu pyša někotre wokna NSLDź motiwy z brunicowych jamow. Narunać chcemy je z mólbami dźěći a młodostnych z Budyšina a serbskorěčneje wokoliny, kotrež pokazuja na wulku pisanosć našeje domizny.“