Inscenacija „Za Marju – Wosrjedź nocy“ wuspěšnu prapremjeru dožiwiła

Budyšin (SN/bn). Prěnja nowa produkcija Serbskeho ludoweho ansambla tuteje hrajneje doby je rejwanski kruch „Za Marju – Wosrjedź nocy“. Sobotu su balet, orchester, spěwni solisća a chór inscenaciju na wupředatej žurli SLA prapremjernje předstajili. Publikum dźakowaše so akteram z dołho trajacym přikleskom za jich rjemjeslnisce bjezporočny wukon.

„Za Marju – Wosrjedź nocy“ nasta po ideji Wilfrieda Buchholza składnostnje lětušich 75. posmjertnin dr. Marje Grólmusec. Nětčiša premjera je wuslědk ně-hdźe połdra lěta trajaceho procesa, w kotrymž bě so Buchholz intensiwnje ze žiwjenjom 1944 w kaceće Ravensbrück wot nacionalsocialistow zamordowaneje serbskeje antifašistki zaběrał.

Na zakładźe listow Marje jeje sotře spisa wón libreto, w kotrymž „to wobswětla, štož so w linkach njejewi“, kaž Buchholz w zawodźe do hry w Röhrscheidtowej bašće rozłoži. Nimo toho wěnowaše so w tym wobłuku wuzwolenej hudźbje Bohuslava Martinůwa.