Doroteja Čejkowa je minjenu sobotu w Zabrodźe wosebitu wustajeńcu wo ewangelskich cyrkwinskich hrónčkach na jutrownych jejkach wotewrěła.

Zabrod (JoS/SN). Hołk a tołk knježeštej sobotu w Zabrodskim muzeju jutrownych jejkow. Křesćanska skupina pućowarjow z Trebbusa we wokrjesu Łobjo-Halštrow bě so přizjewiła. Zhonili běchu woni wo muzeju z wabjenja za muzejowe nocy, kotrež su so mjeztym hižo 15. króć we wokrjesu Sprjewja-Nysa wotměli. Bliskosće k susodnemu wokrjesej dla wobdźěla so kóžde lěto na njej tež Zabrodski muzej jutrownych jejkow Doroteje Čejkoweje – lětsa z wosebitosću.

„Křesćanske hrónčkowe jejka w nałožkach a jako lubosćinske dary“ je hesło wosebiteje wustajeńcy, z kotrejž bě Čejkowa lětsa na muzejowej nocy pódla. Sobotu su ju w Zabrodźe wotewrěli. Spěchowana bu přehladka mjez druhim ze Sakskeho fondsa „Čiń sobu“. Na wopismje, kotrež je ministerski prezident Michael­ Kretschmer (CDU) podpisał, steji:­ „Jeno žiwy region ze sebjewědomymi wobydlerjemi móže strukturnu změnu w sakskej brunicowej kónčinje wuspěšnje zmištrować.“