Wuslědki dweju dźěłarničkow publikum zahorili

Budyšin (SN/CoR). Za něhdźe sto wopytowarjow su minjeny pjatk wječor žurlu Budyskeho Kamjentneho domu za modowu přehladku „Sceniska hudźba – Hip:Fancy.Sorbian.Art“ přihotowali. Zajim – zwjetša tež staršich a přiwuznych na prózdninskim projekće wobdźělenych młodostnych – pak bě tak wulki, zo dyrbjachu stólcy přistajić. Moderatoraj Martin Ludenia z Budyšina a Elżbieta Głowacka-Adamek z Oświęcima staj publikum w němskej a pólskej rěči na zabawne wašnje po programje wjedłoj. Přihladowarjo mytowachu prócu wšitkich ze zahoritym přikleskom, a to nic jenož na kóncu, ale runje tak za jednotliwe přinoški młodych hudźbnikow a na catwalku prezentowace so rejwarki-modele. Mjez wjacorymi spěchowarjemi projekta bě nimo Europskeho fondsa za regionalne wuwiće Interreg tež Załožba za serbski lud.