Budyšin (SN/BŠe/at). „Hromadźe dźiwadło hrać tyje socialnej zhromadnosći“, je sej intendant Budyskeho Němsko-Serbskeho ludoweho dźiwadła Lutz Hillmann wěsty. A tuž je zbožowny był, zo bě so za lětuši 21. swětowy dźeń šulerskeho dźiwadła 30. měrca cyłkownje 36 skupin ze zakładnych a wyšich šulow, gymnazijow a kulturnych towarstwow na wuchodźe Sakskeje za wosebite zetkanje přizjewiło.
Wot dźensnišeho pak je jasne, zo dyrbi podawk bohužel wupadnyć. Tak reaguje NSLDź na poručenje wokrjesneho strowotniskeho zarjada Budyskeho wokrjesa. „Wotprajenje jara wobžarujemy. Njeje tež realistiske dźeń přestorčić, dokelž njeje wuwiće schorjenjow corony dla a z nim zwjazane połoženje na šulach wotwidźomne“, rjekny Hillmann. Wčera bě na internetnej stronje wokrjesa hišće rěč wo „přestorčenju“ zarjadowanja.
