Folkloriada w Baškortostanje wužadanje a zdobom šansa

Paris/Budyšin (SN/bn). Mjezynarodna organizacija za přewjedźenje folklornych festiwalow (CIOFF) je nowy termin za 6. folkloriadu namakała. Koronakrizy dla dyrbjachu lětsa planowane, zdobom jubi­lejne zarjadowanje składnostnje 50. róčnicy załoženja CIOFF, na klětu přestorčić. „Po konsultaciji z knježerstwom Ruskeje federacije kaž tež z knježerstwom Baškortostana wuhotujemy fe­stiwal wot 2. do 11. julija 2021 w Ufje“, orga­nizacija zdźěli. Ufa je stolica awtonomneje republiki Baškortostan a bě jako­ hóstne město „swětoweho swje­dźenja folklory“, kaž folkloriadu tež mjenuja, předwidźana. „Ćežkeje hospodarskeje situa­cije dla, wuskutkowaneje wot pandemije, smy program přikrótšili.“ Město 18 dnjow traje zarjadowanje klětu jenož połdra tydźenja. To zdobom wo­znamjenja, zo „mamy dospołnje nowy financ­ny plan zestajeć. W tym zwisku prosymy wšitkich wobdźělnikow, so znowa registrować dać.“