NSLDź poskići nimale 30 zarjadowanjow pod hołym njebjom

Budyšin (SN/CoR). Tež, hdyž su Budyske 25. lětnje dźiwadło koronapandemije dla wotprajili, móže so publikum přiwšěm na předstajenja pod hołym njebjom Němsko-Serbskeho ludoweho dźiwadła wjeselić. „Hrajna doba běži kaž plano­wane hač do 2. awgusta. Wjeselimy so, zo móžemy za našich přihladowarjow w małej formje na dźiwadłowej zahrodźe hrać. Smy městno, kotrež wopytowarjo wot dnja wotewrjenych duri a premjernych swjedźenjow znaja, na romantiske wašnje ze swěcowymi rjećazami, jewišćom, blidami a stólcami kaž tež deko­raciju wuhotowali. Tak je tež móžno sej škleńčku wina na předstajenju zesłodźeć dać“, informuje medijowa rěčnica NSLDź Gabrie­le Suschke. Wot soboty, 6. junija, chcedźa na zahrodźe z alternatiwnym lětnim dźiwadłom započeć. Hač do 2. awgusta poskića tam dohromady 29 za­rjadowanjow, kotrež maja so při dešćiku w zapadnym foyeru wotměć.