Budyšin (SN/pdź). Marko Dźisławk doby w lońšim wubědźowanju sakskeho fondsa „Čiń sobu!“ myto w kategoriji mjeńšich projektow za ideju serbskeje digitalneje protyčki. „Stajnje sym so mjerzał, hdyž čitach abo słyšach wo wotmětych serbskich zarjadowanjach, na kotrychž bych so tež rady wobdźělił“, Dobroščan rozprawja. „Rozsudźich so tuž nastorčić projekt wobšěrneho a přiwšěm přehladneho kalendra, do kotrehož su tajke za­pisane. Nochcych hižo dlěje zhonić, što je nimo, ale přejach sej medij, kiž přeradźa, što budźe. Myto sakskeho fondsa je mi zmóžniło projekt zwoprawdźić.“

Dokelž pak architekt trěbne znajo­mosće za programěrowanje aplikacije nima­, pytaše sej najprjedy raz wěcy­wustojnu podpěru. „Na zbožo so młoda Serbowka Davina Suchec přizjewi a poskići mi pomoc“, Dźisławk praji. 20lětna Chróšćanka wuknje tuchwilu powołanje medijoweje designerki w Drježdźanskim zawodźe markenbuero. Wona speciali­zuje so na wa­bjenje a programěrowanje a je Dźisławkej aplikaciju po jeho předstawach natwariła.