Kamjenc (CRM/SN). Festiwal šesćiměstow „Přińć a woteńć“, předewšěm wot Swobodneho stata Sakskeje a Załožby za serbski lud spěchowany, je wjelestronski hudźbny event, zwjazowacy Hornju Łužicu z jeje susodnymi regionami, kotryž so tuchwilu třeći raz přewjedźe. Prěnje z dohromady šěsnaće zarjadowanjow wotmě so minjeny pjatk wječor w Kamjencu.

W bywšej „Serbskej cyrkwi“, mjenujcy w klóšterskej cyrkwi swj. Hany, wustupichu ze znatym delnjoserbskim spěwarjom a dirigentom Geraldom Schönom młodźinski wokalny ansambl Studnja kaž tež nowe hudźbne formaty předstajace wuměłcy z Berlina a Braniborskeje. Z iniciatorom a 1. předsydu tuteje festiwalneje ideje, gitaristom a basistom Hansom Narvu, kaž tež z pianistom a komponistom Konstantinom Dupeliusom a akordeonistku Susanne Stock předstajichu woni dalše alternatiwne formy a wobsahi hudźbneje prezentacije na swojotne wašnje.