Kubłarki Njebjelčanskeje pěstowarnje „Jan Skala – Barbojte kamuški“Fota: priwatne
Zawrjene pěstowarnje běchu staršim za čas korony wulke wužadanje. Wosebje tym, kotřiž dyrbjachu w homeofficu dźěći připódla zaběrać. Ćim dźakowniši běchu za rjany serbski dźěćacy poskitk w syći „Lotka a Sophia“. Z krótkimi serbskimi widejemi je internet naše mjeńše serbske dźěći wobohaćił. Jako dźak nahromadźi staršiska přirada pjenježny dar wjacorych předewzaćelow a gmejny. Z pjenjezami smy keramikowe kofejowe šalki pola knjenje Sperlingo­weje w Smječkecach zhotowić dali. Kóžda kubłarka ma nětko kofejowu šalku ze swojim mjenom a pisanymi kamuškami jako dopomnjenku na trochu wosebite lěto 2020. Wutrobny dźak hišće raz Terapijnemu centrumej zapadna Łužica, Serbskopazli­čanskemu Wätzigec zawodej, wuměłstwowemu rjemjeslnikej Konradej Nowakej kaž tež gmejnje Njebjelčicy, zo su rjany dar zmóžnili. Wosebity wjeršk w Njebjelčanskej pěstowarni je domchowanka. Kóžde lěto w septembru starši a dźěći na zahrodźe pěstowarnje zhromadnje jabłuka žněja.