Załožbowa rada nowe wustawki za wuznamjenjenje schwaliła

Budyšin (SN/CoR). Z 12 000 eurami město dotal 7 500 eurow je Myto Ćišinskeho wotnětka dotěrowane, spěchowanske myto ze 4 000 eurami město dotal 2 500. To je mjez druhim wuslědk změnow, z kotrymiž je kuratorij myta wustawki wuznamjenjenja po 26 lětach načasnemu niwowej přiměrił a kotrež je rada Załožby za serbski lud na swojim posedźenju 8. decembra schwaliła. Hižo loni běchu wo móžnych reformach rozmyslowali (SN rozprawjachu), klětu so wone hižo na spožčenje Myta Ćišinskeho a spěchowanskeho myta wuskutkuja. Z počesćenjom maja so dale wusahowace wukony we wobłukach serbskeje kultury, wuměłstwa abo wědomosće resp. wjele lubjace započatki w nich hódnoćić.

Hódnota dotěrowanja njeje jenička změna w dotalnym statuće za nowe Myto Ćišinskeho, kotryž bě załožbowa rada 1994 zasadnje wobzamknyła. Tak maja lawreaća wotnětka nimo wopisma tež čestnu jehłu z podobiznu basnika Jakuba Barta-Ćišinskeho (1856–1909) dóstać.