Budyšin (SN/CoR). Poprawom je so Budyski Serbski muzej na znowawotewrjenje zajutřišim, 1. apryla, hotował. Aktualnje stupacych ličbow koronainfekcijow dla pak to njebudźe. Po tučasnych informacijach budźe muzej wutoru, 20. apryla, zaso wotewrjeny.
Hižo dlěši čas kroči kulturna institucija puć digitalizacije. Wosebje nazymu su na nowych poskitkach dźěłali. Wšitkim tuž, kotřiž nochcedźa z realnym wopytom domu tróšku njewěstych naprawow koronapandemije dla čakać, prezentuje muzej na swojej internetnej stronje někotre digitalne poskitki. Tak móžeš wot spočatka lěta w onlineshopje muzeja nakupować. Paleta wudźěłkow saha wot katalogow k wosebitym wustajeńcam přez pohladnicy (z nowymi motiwami z Trstenjakoweje přehladki) a produkty za wšědny dźeń hač k runje nětko wosebje požadanym jutrownym poskitkam, kaž su to materialije za debjenje jejkow abo hižo pyšene jejka.
