Wosebity fonds Zwjazka za kulturne zarjadowanja předstajili

Zhorjelc (SN/CoR). Kulturny sektor je pod koronapandemiju wosebje ćerpjeł. Zo móhli ručež móžno zaso zarjadowanja přewjesć a riziko hospodarskeje njewěstosće a přemało dochodow hygienowych naprawow dla pomjeńšić, je Zwjazk 26. meje wosebity fonds za kulturne zarjadowanja z cyłkownje 2,5 miliardami eurow nastajił. Ministerstwa za kulturu jednotliwych zwjazkowych krajow su nětko zamołwite program zwoprawdźić. Sakska je mjeztym internetnu stronu zarjadowała, na kotrejž njemóža so zajimcy jenož informować, ale tež swoje zarjadowanja registrować dać a spěchowanske próstwy stajić. Kulturny sekretariat kulturneho ruma Hornja Łužica-Delnja Šleska je póndźelu na informaciske zarjadowanje přeprosył, zo by kulturnikam regiona móžne spěchowanje z tohole fondsa předstajił.