Budyske lětnje dźiwadło z wupředatej a wuspěšnej prapremjeru

Budyšin (SN/bn). „Sym jara wjesoły, zo móžemy tu skónčnje zaso zhromadnje sedźeć. To je wjace hač jeno znamjo nadźije a jasna pokazka na to, zo so do praweho směra pohibujemy!“ Z tutymi słowami zahaji Budyski wyši měšćanosta Alexander Ahrens (SPD) wčerawšu premjeru 25. lětnjeho dźiwadła na Hrodźe sprjewineho města. Krajny rada Michael Harig (CDU) jemu přihłosujo doda: „Je z dobrej tradiciju, zo so měšćanosta a krajny rada jako patronaj tohole wjerška do prěnjeho předstajenja słowa jimataj. Poprawom smój kruch stajnje žortnje připowědźiłoj, čehož pak so dźensa wědomje wzdam. Minjene měsacy su nam wuwědomili, što je, njeje-li dźiwadła. Štož naši wuměłcy tu lěto wob lěto zdokonjeja, njeje samozrozumliwe. Dźakuju so tuž wšitkim, kotřiž su disciplinowani a krej swojeje wutroby dawajo k tomu přinošowali, dźensa zaso tu być směć.