Wuspěšnu imageowu kampanju „Sorbisch? Na klar.“ dale wjedu

Drježdźany (SN/CoR). Loni w februaru su saksku imageowu kampanju „Sorbisch? Na klar.“ zahajili, nětko je krajny sejm za nju we wobłuku dwójneho etata 2021/2022 dalše financowanje 130 000 resp. 100 000 eurow wobzamknył. Zamołwići maja akciju za wuspěšnu. „Najwažniše wuspěchi su, zo dźeń a bóle tež firmy, towarstwa a organizacije – kaž su to na přikład Njedźichowske (Bernsdorf) předewzaće TD Deutsche Klimakompressor GmbH, Nukec napoje a tež cyle aktualnje ,Rěčna swětłownja Wojerecy‘ kampanju na wědomje bjeru, přejo sej wot wužiwanja loga ,Sorbisch? Na klar.‘ nadhódnotu. Tele partnerstwa chcemy rady zesylnić“, rozłožuje medijowy referent sakskeho ministerstwa za wědomosć, kulturu a turizm (SMWK) Dennis Machwitz na naprašowanje SN. Wón ­na to skedźbnja, zo w zjawnym rumje z kampanjowym logom wuhotowany Trilex-ćah, zasadźeny na čarje Zhorjelc–Drježdźany kaž tež mjez Drježdźanami a Žitawu jara daloko skutkuje. Za kampanju wabitej tohorunja w Budyšinje fasada a w regionalnym wobchadźe zasadźeny bus.