Mužakow (CK/SN). Zwjazk a Swobodny stat Sakska spěchujetej tež přichodnje załož­bu Park hrabje Pücklera-Mužakowskeho. Wotpowědne financne dojednanje, pła­ćiwe hač do lěta 2025, staj wčera kulturna zwjazkowa ministerka a społnomócnjena za wuměłstwo a medije prof. Monika Grütters a sakski ministerski pre­zi­dent Michael Kretschmer (wobaj CDU) w Mužakowje podpisałoj. Cyłkownje nało­­žujetaj pjenjezydawarjej přichodne štyri­ lěta dźesać milionow eurow, při čimž sej sumu „fifty-fifty“ dźělitej, kaž Grütters wuzběhny. Połojca srědkow ma běžne kóšty parka zaručeć, tamne pjeć milionow eurow je za inwesticije k dispoziciji. Podpismje podlěšitej wobzamknjenje, na kotrež běštaj so Grütters a te­hdyši sakski ministerski prezident Stanisław Tilich (CDU) hižo 2016 dojednałoj.