Z nowym Serbski institut na dotalne projekty nawjazuje

Choćebuz (SN/CoR). Digitalny portal wo serb­skich a łužiskich rěčnych krajinach je jedyn z dweju projektow Serbskeho instituta, kotrejž Braniborska wot klětušeho z wjace hač dźesać milionami eurow w přichodnych dźesać lětach spěchuje. Dohromady wudawa kraj ze srědkow Zwjazka za strukturnu změnu we wuhlowych regionach 19 milionow eurow za šěsć serbskich projektow. Za zdźě­łanje wobšěrneho digitalneho łužiskeho atlasa, z kotrymž chce Serbski institut (SI) zběrać a wozjewić wšitke móžne a no­we informacije wo Serbach, přewostaji Braniborska wědomostnikam wot januara kóžde lěto 550 000 eurow. Tamne pjenjezy je slědźenišćo za wutworjenje noweho wotrjada za regionalne wuwiće a škit mjeńšin dóstało (SN rozprawjachu).