Na Łužiskej filmowej přehladce pokazachu wčera wječor 13 krótkofilmow
Choćebuz (SN/pdź). W filmowym dźiwadle Weltspiegel su wčera wječor Choćebuski filmowy festiwal zahajili. Něhdźe 200 přihladowarjow wobdźěli so na Łužiskej filmowej přehladce, po kotrejž wjedźeše moderatorka Helena Hartwig. Wona dźěła za Radijo Choćebuz a bě sej modernu interpretaciju delnjoserbskeje drasty z dźěłarnje Wurlawy w Lubnjowje woblekła. Z dypkom 19 hodź. zahaji wona program z předstajenjom jury, kotraž měješe z 13 zapodatych krótkofilmow z maksimalnej dołhosću 20 mjeńšin najlěpše přinoški hódnoćić. Jury wobsteji lětsa z třoch wosobow. Franziska Benack je dramaturgowka při Choćebuskim dźiwadle, Hella Stoletzki filmowča z Choćebuza a Joshua Jadi filmowc z Berlina.
