Ptači kwas „Njewěsta njewjesta“ přihladowarjow zahorił

Chrósćicy (SN/CoR). Z dołho trajacym přikleskom dźakowaše so publikum na premjerje ptačokwasneho programa „Njewěsta njewjesta“ Serbskeho ludoweho ansambla minjeny pjatk hudźbnikam, rejwarjam a spěwarjam za lóštny wječor a jich wuměłski wukon. Něhdźe 400 ludźi dožiwi na dwójce wupředatej žurli Chróšćanskeje „Jednoty“ dohromady tři předstajenja spěwohry w dźesać wobrazach, kotruž chcychu ansamblowcy poprawom hižo loni pokazać a kotruž su po wotprajenju w decembrje korony dla nětko přiwšěm krótkodobnje zwoprawdźili. „Dźakuju so wosebje wšitkim sobudźěłaćerjam za a před jewišćom za wulkotne zhromadne dźěło w tymle chětro wobćežnym času“, wuzběhny intendant SLA Tomas Kreibich-Nawka na spočatku a wužiwaše składnosć, publikumej noweho nawodu chóra Tvrtka Karlovića a wot nowembra hakle skutkowaceho noweho nawodu orchestra Petera We­senAuera prezentować. Tón zdoby sej hnydom sympatije Serbow, jako jich jenož serbsce njepostrowi, ale so samo z dobrej porciju humora w hišće za sebje nowej rěči předstaji.