Wulki europski pilotowy projekt „The Lusatia Glow“ w Brüsselu přizjewili

Brüssel (SN/CoR). Jako „kompletny nowy přistup a nowu paradigmu za europsku integraciju přez etniske mjeńšiny a małe rěče“ je předsyda załožby Slavonic Europe (słowjanska Europa) David Chmelík wčera na nowinarskej konferency w Brüsselskim medijowym klubje iniciatiwu Lu­satia Glow (łužiske swěćenje) hromadźe z dalšimi partnerami předstajił. „Město toho, zo započinamy w stolicach europskich statow, startujemy na mjezach. ­Dokelž žadaja sej hranicy přechod, započnje tu zhromadnosć. A my zaha­jimy našu wot Čorneho morja hač do ­Atlantika sahacu iniciatiwu we Łužicy, w třikrajowym regionje mjez Pólskej, ­Čěskej a Němskej, w Serbach“, bywši wjelelětny zastojnik europskeje komisije wuzběhny.