Hłuboko trjechiła je mje powěsć, zo je Ralf Bursy 14. februara w starobje 66 lět po ćežkej chorosći zemrěł. Znata bě NDRska rockowa legenda pod mjenom Ralf „Bummi“ Bursy.

Tež mi wostanje 18. januara 1956 w Berlinje rodźeny njezapomnity. W běhu nimale połdra lětdźesatka sym w jeho hudźbnym studiju w Berlinje-Köpenicku po towaršnostnym přewróće hač do spočatka 2000tych lět za serbski rozhłós wjacore sta spěwow produkował. Mi bě wón prawdźepodobnje z prawej ruku. Bursy­jowe studijo, w pincy jeho bydlenskeho domu zaměstnjene, bě te­hdy po najmodernišim techniskim standardźe mjezynarodnych hudźbnych studijow wuhotowane. W času, jako su serbski rozhłós kónc 80tych lět z wulkimi narokami wobsahowje kaž tež po městnosći na štwórtym poschodźe Budyskeho Serbskeho ­domu wutwarjeli, bě nowa a wosebje načasna serbska zabawna hudźba trěbna. A runje za to bě nam Bursyjec Berlinske studijo najlěpša adresa. Jako z nowymi spěwnymi talentami k njemu přijědźech, mi Ralf zas a zaso přišeptny: „Wy Serbja móžeće na swoju kulturu a rěč hordźi być. To tež druzy hudźbnicy a spěwarjo tu praja.“