Załožba koordinuje přizwolenje srědkow za strukturnu změnu

Budyšin (SN/bn). Załožba za serbski lud je z digitalnje wuhotowanym „informaciskim zarjadowanjom“ na zakładźe wjacorych přikładow dohlad do swojeje dźěławosće dała a wo móžnosćach spěchowanja informowała. Ćežišćo wčerawšeje prezentacije pak běštej nowej programaj „Serbska rěč a kultura w strukturnej změnje“, kotrejž maja wot lětušeho přidatne spěchowanje zmóžnić.

Spočatnje rozłožištej sobudźěłaćerce załožby Felizitas Birkhofenowa a Nicole Zimmermannec „klasiske“ wobłuki spěchowanja. Mjez druhim zjimaše Birkhofenowa loni zahajene idejowe wubědźowanje, z kotrymž su dohromady 24 projektam cyłkownje 80 000 eurow přizwolili. „Wažne nam w tym zwisku bě, cyłu Łužicu wobkedźbować. Rozsudne kriterije běchu, zo namjety žiwej rěči a kulturje polěkuja, naslědnosć zaručeja a/abo ­z inowatiwnym konceptom přeswědčeja. Dalši faktor bě prawdźepodobny zjawny wothłós“, wona rozłoži a připowědźi, zo hižo nětko klětuše, potom druhe idejowe wubědźowanje přihotuja.