Nowostki a klasikarje serbskeho nakładnistwa lětsa zaso tež w Praze
Budyšin (SN/bn). Ludowe nakładnistwo Domowina planuje za lěto 2022 dohromady něhdźe 50 publikacijow wudać, inkluziwnje nowonakładow, ale bjez wučbnicow. Hižo wušli su na přikład třeći zwjazk serbsko-němskeje zběrki lyriki Kita Lorenca „Gedicht-Geschichten – Wólny wjerš a forma ryma“, druhi nakład čitanki „Pod Čornobohom“ a dalši nakład dwuzwjazkoweho Němsko-hornjoserbskeho słownika. Tohorunja hižo na předań je młodźinski roman Ivony Březinoveje „Bjez čriji“ w hornjoserbskim přełožku Jany Štilleroveje a Pětra Šołty. Oficialna knižna premjera budźe póndźelu, 21. měrca, w Serbskim gymnaziju Budyšin.
