Załožba Volkswagen spěchuje projekt Serbskeho instituta a Drježdźanskeje TU

Drježdźany/Budyšin/Choćebuz (SN). „Integrated Digital Sorbian Studies“ (IDSS) rěka nowy kooperaciski projekt Serbskeho instituta w Budyšinje/Choćebuzu (SI) z Techniskej uniwersitu Drježdźany (TUD). Na šěsć lět zapołožene předewzaće ma so w meji 2022 započeć. Přez projekt budźe sorabistika jako tak mjenowany mały předmjet na TUD widźomniši, lěpje integrowany a splećeny.

Załožba Volkswagen spěchuje projekt z nimale milionom eurow we wobłuku spěchowanskeje linije „Swětowa wěda – strukturne sylnjenje małych předmjetow“. Tak je móžno wjacore personalne městna na woběmaj zarjadnišćomaj financować, mjez druhim dwě městnje za dorostowej wědomostnicy abo dorostoweju wědomostnikow. Předewzaće ma ze swójskim podźělom SI a TUD cyłkowny wobjim něhdźe 1,6 milionow eurow.