Po dwulětnej přestawce 21. swětowy dźeń šulerskeho dźiwadło

Budyšin (SN/CoR). Z wulkim finalom je so wčera popołdnju 21. swětowy dźeń šuler­skeho dźiwadła na hłownym jewišću Budyskeho Němsko-Serbskeho ludoweho dźiwadła skónčił. Něhdźe 1 500 přihladowarjow je dohromady 17 zarjadowanjow na sydom jewišćach dožiwiło. 210 młodych talentow z pěstowarnjow, zakładnych a wyšich šulow, gymnazijow, rejwanskich towarstwow a Dźiwadłoweho kluba za młodych ludźi při NSLDź je swoje hrajerske a rejwanske kmanosće prezentowało. „Nalada bě wulkotna. Wjeselo, po dwěmaj lětomaj znowa na jewišću stać a kruchi tamnym młodym ludźom předstajić, bě hoberske“, rjekny iniciatorka a organizatorka wosebiteho zarjadowanja za dorost Heide-Simone Bartowa. Intendant NSLDź Lutz Hillmann dźakowaše jej wčera z kwěćelom za wunamakanje eventa a angažement, šulerki a šulerjo podźakowachu so z wulkim aplawsom.