Budyšin (SN/MiR). Něhdźe 50 šulerkow a šulerjow 6. lětnika ze serbskich a serbšćinu wuwučowacych šulow ze Sakskeje wubědźuje so wot dźensa we Wodowych Hendrichecach wo najlěpše wukony w serbšćinje. Zastupjene su wyše šule Slepo, Kulow, Ralbicy, Worklecy a Budyšin kaž tež Budyski Serbski gymnazij a Lessingowy gymnazij Wojerecy. W třoch skupinach – maćernorěčni šulerjo, serbšćinu po koncepće 2plus abo jako cuzu rěč – wuknjacy, maja woni swoje dokonjanosće dopokazać. Tema, z kotrejž so woni lětsa zaběraja rěka „Pčołka“. Studenća wučerstwa kaž hižo na dotalnych olympiadach šulerki a šulerjow přewodźeja. W cyłku je jich jědnaće młodych maćernorěčnych Serbow, kotřiž w Lipsku abo Drježdźanach studuja. Hłowny nadawk zdźěłanje nadawkow nastupajo ma wučerka Radworskeje wyšeje šule „Dr. Marja Grólmusec“ Sabina Jurencec. Nimo pruwowanjow je Serbske šulske towarstwo jako nošer zarjadowanja přihotowało přidatne poskitki. Tak póńdu wobdźělnicy dźensa wječor do kina a jutře na diskoteku, zo bychu so mjezsobu lěpje ­ze­znali.