Ketlicy (LTh/SN). Krasne to dožiwjenje za spěwarki a spěwarjow chóra „Budyšin“ a cyrkwinskeho chóra Lubijsko-Žitawskeje eforije a za něhdźe sto připosłucharjow, jako zaklinči minjenu sobotu nawječor oratorij „Podlěćo“ w Ketličanskej cyrkwi, na městnje wjelelětneho skutkowanja Korle Awgust Kocora.
W jubilejnym lěće 2022 běchu sej Serbja južnych a wuchodnych stron předewzali, hromadźe z němskimi spěwarjemi znowa přednjesć oratorij, kaž běchu to 2019 hižo wuspěšnje ze „Serbskim rekwiemom“ zdokonjeli. A što so lěpje hodźi do tutoho krasneho počasa hač oratorij „Podlěćo“ ze zahorjacymi spěwami kaž „Kak stupa so lóštnje a wjesele“ abo „Nasyćene, napowane z wěčnym darom duše su a do próstwy wobzamkane časne dary na polu“ abo „Swjaty Jan žně skazuje, syc łučku trawnitu“. Pod dostojnym nawodom cyrkwinskeho hudźbneho direktora Christiana Kühne zaspěwachu „Podlěćo“ cyle po něhdyšej hudźbno-koncertantnej praksy, mjenujcy jeno z klawěrnym přewodom.
